महत्वाच्या बातम्या

रोड रॉबरी व दुचाकी चोरांना अटक : एल. सी. बी. ची कारवाई

विदर्भ न्यूज एक्सप्रेस

प्रतिनिधी / बल्लारपूर : १५ एप्रिलला शहरातील स्टेट बँक ऑफ इंडिया जवळ मूल रोड चंद्रपुर येथे एका युवकाने दुचाकीवर असलेले पती-पत्नी यांचा पाठलाग करीत पत्नीच्या हातात असलेली पर्स हिसकावीत पळ काढला होता.

याबाबत रामनगर पोलीस स्टेशनमध्ये गुन्हा दाखल करण्यात आला, सदरचा तपास स्थानिक गुन्हे शाखेकडे वर्ग करण्यात आला.

त्या पर्स मध्ये रोख ३२ हजार व मोबाईल असा एकूण ६२ हजार रुपयांचा मुद्देमाल होता.

स्थानिक गुन्हे शाखेने तपासाचे चक्रे फिरवली असता रामनगर पोलिसांच्या रेकॉर्डवरील गुन्हेगार १९ वर्षीय आशिष उर्फ जल्लाद अक्रम शेख, रा. फुकटनगर हा महाकाली कॉलरी येथे बिल नसलेला मोबाईल विकण्याकरिता फिरत असल्याची माहिती स्थानिक गुन्हे शाखेला मिळाली.

स्थानिक गुन्हे शाखेने सापळा रचून आशिष ला अटक करीत त्याची अंगझडती घेतली असता त्यांच्याजवळून एक मोबाईल, रोख ८ हजार रुपये सहित ३८ हजारांचा मुद्देमाल आढळला.

आरोपीने एका दिवसांपूर्वी स्टेट बँक ऑफ इंडिया जवळील एका महिलेच्या हातातील पर्स हिसकावली असल्याचा गुन्हा कबूल केला.

आरोपीबाबत अधिक चौकशी केली असता त्याने भिवापूर भागातून एक दुचाकी वाहन क्रमांक MH34 AG 8577 हे चोरी केले असल्याचे सांगत रात्री ३ घरफोड्या करीत सोन्या-चांदीचे दागिने नागपूर मध्ये विकल्याचे सांगितले.

तसेच बल्लारपूर शहरातील शासकीय रुग्णालयासमोरून चोरी गेलेली दुचाकी क्रमांक MH34 U7031 या वाहनाचा गुन्हा स्थानिक गुन्हे शाखेने उघडकीस आणला. या गुन्ह्यातील आरोपी ३८ वर्षीय अमित हिरालाल निषाद रा. मौलाना आझाद वार्ड, बल्लारपूर याला चंद्रपुरतील दत्तनगर भागातून ताब्यात घेत चोरी गेलेली दुचाकी जप्त करण्यात आली.

सदरची यशस्वी कारवाई पोलीस अधीक्षक रविंद्रसिंग परदेशी, अप्पर पोलीस अधीक्षक रिना जनबंधु यांच्या मार्गदर्शनाखाली पोलीस निरीक्षक महेश कोंडावार यांच्या नेतृत्वात सपोनि जितेंद्र बोबडे, पोलीस कर्मचारी संजय आतकुलवार, संतोष एलपूलवार, नितीन रायपूरे, प्रांजल झिलपे, गोपाल आतकुलवार, नरेश डाहूले, प्रमोद डंभारे यांनी केली.