आता केबल, डीटीएच, आयपी टीव्ही, हिट्स कंपन्यांसाठी एकच दर


वृत्तसंस्था / नवीदिल्ली :  'पॅकेज'च्या नावाखाली भरमसाठ चॅनेल माथी मारून पैसे उकळणाऱ्या डीटीएच  कंपन्या आणि केबल नेटवर्कना केंद्रीय दूरसंचार नियामक मंडळाने (ट्राय) चाप लावला असून, केबल, डीटीएच, आयपी टीव्ही, हिट्स कंपन्यांसाठी एकच दर निश्चित करण्यात आला आहे. प्रत्येक डीटीएच आणि केबल नेटवर्क कंपन्यांना सर्व चॅनेल्सच्या किमती त्यांच्या वेबसाइटवर ठळकपणे नमूद कराव्या लागणार आहेत. 
ग्राहकांची ही पिळवणूक थांबवण्यासाठी मुंबई ग्राहक पंचायतीने सन २००३मध्ये आवाज उठवला होता. २०० रुपयांहून अधिक केबल सेवादर असू नये, असा ग्राहक पंचायतीचा आग्रह होता. अखेर 'ट्राय'ने पॅकेज व्यवस्था रद्द करण्याचा निर्णय घेतला आहे. ग्राहकांना आता हव्या त्या चॅनेल्सची निवड करून त्यांच्या एमआरपीवर १८ टक्के जीएसटी भरून चॅनेलचा आस्वाद घेता येणार आहे. 'ट्राय'ने या व्यवस्थेत महत्त्वाचा बदल करत कोणत्याही चॅनेलची एमआरपी १९ रुपयांपेक्षा अधिक असू नये, असे जाहीर केले आहे, यामुळे हा ग्राहकांचा विजय असल्याचे मत ग्राहक पंचायतच्या अध्यक्ष व या लढ्याच्या प्रणेत्या वर्षा राऊत यांनी व्यक्त केले. देशात सर्वत्र मोफत असलेल्या (फ्री टू एअर) सर्व चॅनेलसाठी एकत्रित मिळून १३० रुपये दर निश्चित करण्यात आला आहे. 

'एमआरपी'पेक्षा जास्त दर आकारणे गुन्हा 

कोणत्याही चॅनेल पुरवणाऱ्या डिश टीव्ही आणि केबल कंपनीला कोणत्याही परिस्थितीत एमआरपीपेक्षा अधिक दर आकारता येणार नाही. तसे झाल्यास त्यांच्यावर फौजदारी गुन्हा दाखल करण्याची तरतूद 'ट्राय'च्या नियमावलीत करण्यात आली आहे. 

केबल चालकांचा विरोध 

केबल चालकांनी या निर्णयाला तीव्र विरोध केला असून, याविरोधात राष्ट्रपती, 'ट्राय'चे संचालक तसेच केंद्रीय माहिती व प्रसारणमंत्र्यांना पत्र पाठविण्यास सुरुवात केली आहे. या आंदोलनात देशभरातील केबल चालक सहभागी होत असल्याचे महाराष्ट्र नवनिर्माण केबल सेनेचे सरचिटणीस तुषार आफळे यांनी सांगितले. 



  Print






News - World | Posted : 2018-12-16






Related Photos