महत्वाच्या बातम्या

गोसीखुर्द प्रकल्पांतर्गत लाभार्थींसाठी आकोट येथे शेतकरी समृध्दी कार्यशाळा संपन्न

विदर्भ न्यूज एक्सप्रेस
प्रतिनिधी / भंडारा : जलजागृती सप्ताह निमित्ताने गोसीखुर्द उपसा सिंचन मंडळ, आंबाडी येथे गोसीखुर्द डावा कालवा विभाग वाही कार्यालयाने, आकोट उपसा सिंचन योजनाच्या शिर्षस्थळी गोसीखुर्द डावा कालवा व आकोट उपसा सिंचन योजना लाभक्षेत्रातील शेतकऱ्यांकरीता शेतकरी समृध्दी कार्यशाळा कार्यक्रमाचे आयोजन केले. या कार्यक्रमा करीता गोसीखुर्द प्रकल्पातील तालुका पवनी क्षेत्रामधील जवळपास 350 लाभार्थी शेतकरी उपस्थित होते.

कार्यक्रमाला आमंत्रित असलेल्या प्रमुख अतिथी तथा अधिकारी यांनी शेतकऱ्यांना पाणी वापर संस्थाचे महत्व व संभाव्य अडचणी, पीक बदल फळबाग व्यवस्थापन, शेती व्यवस्थापन व आर्थिक विकास आणि पशुधन, चारा उत्पादन दुग्ध व्यवसाय व जोडव्यवसाय या बद्दल उपस्थित शेतक-यांना मार्गदर्शन केले. कार्यक्रमाची सुरुवात उपस्थित मान्यवरांचे हस्ते भारतरत्न डॉ. मो. विश्वेश्वरैया यांच्या प्रतिमेस पुष्पहार अर्पण करुन व दिप प्रज्ज्वलानाने करण्यात आली.

या कार्यक्रमांतर्गत व्याख्यातांनी शेतकरी राजास कमी खर्चामध्ये व कमी पाण्यामध्ये दर्जेदार व चांगल्या वाणाचे पीक कसे घ्यावे याबाबत बहुमुल्य मार्गदर्शन केले यासोबतच शेतीमधुन निघालेल्या शेतमालाला अपेक्षित बाजारभाव कसे प्राप्त करावे याकरीता उपयुक्त सल्ला व मार्गदर्शन केले आहे. शेतकऱ्यांना शेतामधील जमिनीची सुपिकता व पाणी धारण क्षमता सुधारण्यासाठी मोलाचे मार्गदर्शन केले. यावेळी प्रगतीशील शेतक-यांचा सत्कार शाल श्रीफळ व फळझाडे देऊन करण्यात आला.

या कार्यक्रमाला अध्यक्षपदी सेवानिवृत्त अधिक्षक अभियंता जलसंपदा विभाग एस.एम.आपटे, तसेच प्रमुख पाहुणे सचिव ग्रामिण युवा प्रागतिक मंडळ अविल बोरकर व प्रमुख मार्गदर्शक म्हणून पशुधन विकास अधिकारी नागपुर डॉ. अविरत सवईमुल तसेच गोसीखुर्द प्रकल्पातर्फ़े कार्यकारी अभियंता लघु पाटबंधारे विभाग अ. वि. फ़रकडे प्रशांत गोडे, कार्यकारी अभियंता गोसीखुर्द उपसा सिंचन विभाग आंबाडी अ.वि.फ़रकडे, कार्यकारी अभियंता गोसीखुर्द धरण विभाग वाही शर्मा तसेच भंडारा जिल्हा अंतर्गत जलसंपदा विभागाचे सर्व उप विभागीय अभियंता व शाखा अभियंता उपस्थित होते.

या कार्यक्रमाच्या आयोजनाची व्यवस्था अधिक्षक अभियंता गोसीखुर्द उपसा सिंचन मंडळ, आंबाडी वेमुलकोंडा यांचे मार्गदर्शनाखाली कार्यकारी अभियंता गोसीखुर्द डावा कालवा विभाग वाही सुहास मोरे व सहाय्यक अभियंता श्रेणी नितीन सोनटके यांनी सांभाळली.