महत्वाच्या बातम्या

गोंडवाना विद्यापीठात होणार अद्ययावत स्पोर्ट्स अकॅडमी

- सिनेट सदस्य डॉक्टर सागर वझे यांच्या प्रयत्नांना यश

विदर्भ न्यूज एक्सप्रेस
प्रतिनिधी / वरोरा : नुकतीच गोंडवाना विद्यापीठाची अधीसभा गडचिरोली येथे पार पडली. यामध्ये 2023- 24 चे मूळ अंदाजपत्रक सादर करण्यात आले, आणि विद्यार्थी कल्याणाच्या विविध योजनांच्या घोषणा करण्यात आल्या. विशेष म्हणजे यामध्ये गोंडवाना विद्यापीठा अंतर्गत येणाऱ्या खेळाडू करिता सुसज्ज स्पोर्ट्स अकॅडमी करिता भरीव निधीची तरतूद करावी अशी मागणी वरोरा येथील सिनेट सदस्य डॉक्टर सागर वझे यांनी अधीसभेत केली आणि ती मान्य करण्यात आल्याने क्रीडा वर्तुळात आनंद पसरला आहे.

येत्या शैक्षणिक वर्षापासून राष्ट्रीय शैक्षणिक धोरणाची प्रभावी अंमलबजावणी करण्याच्या दृष्टीने गोंडवाना विद्यापीठाचा अर्थसंकल्प तयार करण्यात आला असून विद्यापीठाच्या परिक्षेत्रातील विद्यार्थ्यांच्या संशोधक वृत्ती चालना देण्यासोबतच, त्यांच्या सर्वांगीण विकासावर भर देण्यात आलेला आहे. चंद्रपूर गडचिरोली या आदिवासी बहुल दोन जिल्ह्यांमधील खेळाडूनी विविध खेळांमध्ये राष्ट्रीय आणि आंतरराष्ट्रीय स्पर्धांमध्ये प्रतिनिधित्व केले आहे. या उदयोन्मुख आणि आंतरराष्ट्रीय पातळीवर नाव उंचावणाऱ्या खेळाडूंना प्रोत्साहन मिळावे याकरिता विद्यापीठात क्रीडा अकॅडमी स्थापन करण्यात यावी असा प्रस्ताव सिनेट सदस्यांनी मांडताच कुलगुरू डॉ प्रशांत बोकारे यांनी प्रस्तावाचे स्वागत केले.

गोंडवाना विद्यापीठातील क्रीडा विभागात विद्यार्थ्यांना अनेक अडचणींना सामोरे जावे लागते. या अडचणी दूर करण्याकरिता प्रयत्न केले जात असून त्याकरिता स्पोर्ट्स अकॅडमी तयार करण्यासाठी ही पावले उचलली गेली असल्याचे कुलगुरू यावेळी म्हणाले. मात्र सुरुवातीच्या टप्प्यात 50 लाखाच्या निधीची तरतूद ही तोकडी असून ती पाच करोड करण्याची मागणी अस्थिरोग तज्ञ आणि क्रीडा विज्ञान विषयाचे जाणकार सिनेट सदस्य डॉ सागर वझे यांनी सभेमध्ये केली. उपस्थित सर्व सदस्यांनी त्याला दुजोरा देताच ही तरतूद लवकरच 5 करोड करण्यात येण्याचे आश्वासन कुलगुरूंनी दिले. स्पोर्ट्स अकॅडमी करिता कोणताही निधी कमी पडू देणार नाही असेही कुलगुरू म्हणाले.

विशेष म्हणजे विद्यापीठाच्या परिसरामध्ये फुटबॉल मैदान तयार केले जात आहे. आणि या स्पोर्ट्स अकॅडमीचे नियोजन आणि कार्यान्वयन व्हावे याकरिता एक समिती लवकरच तयार करण्यात येणार असून, डॉ सागर वझे हे या समितीचे अध्यक्ष असतील असेही कुलगुरू म्हणाले. डॉ वझे हे याविषयीचे तज्ञ असून त्यांनी या अकॅडमीकडे विशेष लक्ष द्यावे अशी अपेक्षा कुलगुरूंनी याप्रसंगी व्यक्त केली. डॉक्टर सागर वझे यांनी दिलेल्या आश्वासनाची पूर्तता त्यांनी केल्याबद्दल आणि स्पोर्ट्स अकादमीच्या त्यांच्या पुढाकाराचे सर्वत्र अभिनंदन करण्यात येत आहे.