वीजपुरवठा नियमानुसार खंडित करण्यासोबतच कार्यालयीन कामात दिरंगाई करणाऱ्या कर्मचाऱ्यांच्या बदल्या करा : खंडाईत


विदर्भ न्यूज एक्सप्रेस 
प्रतिनिधी / नागपूर : 
वीजबिलापोटी थकबाकी असलेल्या ग्राहकांचा वीजपुरवठा नियमानुसार खंडित करण्यासोबतच कार्यालयीन कामात दिरंगाई करणा-या कर्मचाऱ्यांच्या बदल्या करण्याच्या स्पष्ट सूचना महावितरणच्या नागपूर परिक्षेत्राचे प्रादेशिक संचालक भालचंद्र खंडाईत यांनी दिल्या.
महावितरणच्या पाचही परिमंडळातील वरिष्ठ अधिकाऱ्यांची संयुक्त आढावा बैठक आयोजित करण्यात आली होती. घरगुती, वाणिज्यिक आणि औद्योगिक ग्राहकांसोबतच सार्वजनिक पाणीपुरवठा योजना, पथदिवे यांच्याकडे वीजबिलापोटी असलेली थकबाकी पूर्णपणे वसूल करणे क्रमप्राप्त असून, या कामात दिरंगाई करणाऱ्या कर्मचाऱ्यांच्या इतरत्र बदल्या करण्याच्या सूचनाही त्यांनी केल्या. यावेळी खंडाईत यांनी एप्रिल ते नोव्हेंबर या कालावधीतील लघुदाब आणि उच्चदाब ग्राहकांकडील मागणी आणि वसुली यांचा सविस्तर आढावा घेत ४५ पेक्षा अधिक दिवसांपासून थकबाकीदार असलेल्या उच्चदाब ग्राहकांचा वीजपुरवठा त्वरीत खंडित करा. लवादाकडे प्रविष्ठ आणि तत्सम प्रकरणांत चालू वीजबिलाचा भरणा करण्यास टाळाटाळ करणाऱ्या ग्राहकांचाही वीजपुरवठा खंडित करण्याच्या सूचनाही त्यांनी यावेळी केली.
मुख्यालयाने उपलब्ध करून दिलेल्या थकबाकीदारांच्या यादीवर पूर्णपणे काम होणे अपेक्षित असून, या यादीत परत समावेश झालेल्या थकबाकीदार ग्राहकांची तपासणी वरिष्ठ अधिकाऱ्यांनी त्वरित करण्याबाबतही त्यांनी सांगितले. संशयास्पद मीटर नोंदीची शंभर टक्के फेरतपासणी करण्यासोबतच नागरी उपविभागात नवीन वीजजोडणी ऑनलाइन पद्धतीनेच करण्याच्या सूचनाही त्यांनी यावेळी केल्या. उच्चदाब वितरण यंत्रणे अंतर्गत नियोजित उपकेंद्रांसाठी उपलब्ध जागांसोबतच क्रेडिट बिल, डेबिट बिल, लाइन कॅपेसिटर, सबस्टेशन कॅपेसिटर, पुनर्रचित गतिमान विद्युत विकास व सुधारणा आराखडा (आरएपीडीआरपी) अंतर्गत दिल्या जाणाऱ्या वीजजोडण्या, मीटर रीडिंग आणि बिलिंगचा विस्तृत आढावाही घेतला.
या बैठकीला मुख्य अभियंता दिलीप घुगल, सुहास रंगारी, अरविंद भादीकर, सुचुत्रा गुजर, सुखदेव शेरकर, प्रभारी मुख्य अभियंता पवनकुमार कछोट, महाव्य्वस्थापक (वित्त व लेखा) शरद दाहेदार यांच्यासह नागपूर परिक्षेत्रांतर्गत असलेल्या नागपूर, अकोला, अमरावती, चंद्रपूर आणि गोंदिया या पाचही परिमंडलातील अधीक्षक अभियंते, कार्यकारी अभियंते, वरिष्ठ व्यवस्थापक (वित्त व लेखा) आणि इतर वरिष्ठ अधिकारी उपस्थित होते.



  Print






News - Nagpur | Posted : 2018-12-08






Related Photos