धानोरा येथे रिपब्लिकन पक्षाची बैठक संपन्न
- विविध समस्यांवर चर्चा
विदर्भ न्यूज एक्सप्रेस
प्रतिनिधी / गडचिरोली : अखिल भारतीय रिपब्लिकन पक्ष तालुका धानोराची बैठक शासकीय विश्राम गृह धानोरा येथे नुकतीच संपन्न झाली. या बैठकीत धानोरा तालुक्यातील जनतेच्या विविध समस्यांवर सविस्तर चर्चा करण्यात आली व काही महत्वपूर्ण ठराव पास करण्यात आले. धानोरा येथील बौद्ध समाजाने उभारलेल्या डॉ. बाबासाहेब आंबेडकरांच्या पुतळ्याचे अनावरणाची त्वरित परवानगी देण्यात यावी, मनरेगा मजुरांचे आधार लिंक अभावी अडवून
ठेवलेले पेमेंट त्वरित अदा करण्यात यावे, मजुरांच्या आधार लिंकचे काम प्रत्येक गावात जाऊन करण्यात यावे, शासकीय व निमशासकीय कर्मचाऱ्यांना त्याच्या मुख्यालयी राहणे सक्तीचे करावे, धानोरा गडचिरोली मार्गावरील लेख गावाजवळी रस्ता त्वरित दुरुस्त करण्यात यावा, घरकुल योजने अंतर्गत बांधण्यात येत असलेल्या घरकुलांचे पेमेंट त्वरित करण्यात यावे, पेसा अंतर्गत करण्यात येणाऱ्या तेंदू पत्ता संकलनाचे टेंडर ग्राम पंचायत स्तरावर करण्यात यावे, तालुक्यात रोजगार हमीची कामे सुरु करण्यात यावी, महामंडळ मार्फत करण्यात येत असलेल्या धान खरेदीचे पेमेंट त्वरित करण्यात यावे, धान खरेदीची मुदत ३१ मार्च पर्यंत वाढविण्यात यावी, इत्यादी मागण्यांचा त्यात समावेश होता. रिपब्लिकन पक्षाचे धानोरा तालुका अध्यक्ष रमेश बारसागडे यांचे अध्यक्षतेखाली झालेल्या बैठकीत पक्षाचे केंद्रीय उपाध्यक्ष रोहिदास राऊत, प्रदेश उपाध्यक्ष कुलपती मेश्राम, विदर्भ उपाध्यक्ष प्राचार्य प्रकाश दुधे, प्रदेश सचिव प्रा. राजन बोरकर, विधान सभा अध्यक्ष प्रदीप भैसारे, जिल्हा अध्यक्ष हंसराज उंदीरवाडे, उपाध्यक्ष दुर्योधन सहारे, विशालसिंग परिहार, भानुदास बांबोडे, गिरीधर बारसागडे व अन्य कार्यकर्ते उपस्थित होते.
या मागण्या त्वरित पूर्ण न झाल्यास पक्षातर्फे आंदोलन करण्याचा इशारा बैठकीत देण्यात आला.
News - Gadchiroli