महत्वाच्या बातम्या

राज्यस्तरीय बेसबॉल क्रिडा स्पर्धेत मुलांमध्ये नाशिक व मुलींमध्ये पुणे विभाग प्रथम

विदर्भ न्यूज एक्सप्रेस

प्रतिनिधी / वर्धा : राज्यस्तरीय शालेय बेसबॉल क्रिडा स्पर्धेत मुलांमध्ये नाशिक विभाग तर मुलींमध्ये पुणे विभागाने प्रथम क्रमांक पटकावून विजय संपादन केला. विजयी ठरलेल्या चमूंना ट्राँफी व प्रमाणपत्र देऊन मान्यवरांच्या हस्ते गौरविण्यात आले.

यावेळी राज्य युवा पुरस्कारार्थी सारंग रघाटाटे, शिवछत्रपती पुरस्कारार्थी किशोर पोफळी, रामराव किटे, जिल्हा क्रिडा अधिकारी लतिका लेकुरवाळे यांनी विजयी चमूचे कौतूक करत त्यांना पुरस्कार वितरित केले.

जिल्हा क्रिडा संकुल येथे क्रीडा व युवक सेवा संचालनालय, जिल्हा क्रिडा अधिकारी कार्यालय तथा जिल्हा क्रिडा परिषद व महाराष्ट्र बेसबॉल संघटनेच्या संयुक्त विद्यमाने 16 ते 18 जानेवारी या कालावधीत राज्यस्तरीय बेसबॉल शालेय क्रिडा स्पर्धेचे आयोजन करण्यात आले होते. या स्पर्धेमध्ये आज झालेल्या 17 वर्ष वयोगटातील अंतीम सामन्यामध्ये मुलांमध्ये प्रथम क्रमांक नाशिक विभागातील जळगाव जिल्ह्यातील चाळीसगाव तालुक्यातील राष्ट्रीय विद्यालयाने, द्वितीय क्रमांक पुणे जिल्ह्यातील इंदापुर येथील नारायणदास रामदास हायस्कुलने तर तृतीय क्रमांक मुबंई येथील राजहंस विद्यालयाने पटकविला.

मुलींमध्ये प्रथम क्रमांक पुणे जिल्ह्यातील इंदापूर येथील डॉ.कदम हायस्कुल, द्वितीय क्रमांक अमरावती येथील चंद्रभानजी विलय कुंड हायस्कुलने तर तृतीय क्रमांक कोल्हापूर जिल्ह्यातील गडमुडशींगी येथील न्यु इंग्लीश स्कुल यांनी पटकाविला. सर्व विजेत्या संघांना समारोपिय कार्यक्रमात मान्यवरांच्या हस्ते ट्रॉफी व प्रमाणपत्र देऊन गौरविण्यात आले. कार्यक्रमाला तालुका क्रिडा अधिकारी संजय कथळकर यांची उपस्थिती होती. कार्यक्रमाचे संचालन नितीश झाडे यांनी केले तर आभार संदीप खोब्रागडे यांनी मानले.