नातीवर अत्याचार करणाऱ्या आजोबाला जन्मठेप


- कोल्हापूर जिल्हा न्यायालयाचा निकाल
विदर्भ न्यूज एक्सप्रेस 
प्रतिनिधी / कोल्हापूर
: जिल्ह्यातील कनाननगर येथे घरात एकटी असल्याची संधी साधून ११ वर्षीय नातीवर अत्याचार केल्याचे दोषारोपपत्र न्यायालयात सादर केले असता जिल्हा व सत्र न्यायाधीश एम. के. जाधव यांनी नराधम आजोबाला जन्मठेपेची शिक्षा सुनावली. गणपती आदमाने (६५) रा. रांगोळी, ता. हातकणंगले असे शिक्षा सुनावण्यात आलेल्या आरोपीचे नाव आहे . 
 पीडित मुलगी आई-वडील व लहान भाऊ यांच्यासमवेत कनाननगर येथे राहत असून वडील मध्यवर्ती बसस्थानक परिसरात गजरे, फुले; तर आई भाजीपाला विक्रीचा व्यवसाय करते. दरम्यान, रांगोळी येथे राहणारा आजोबा गणपती आदमाने हा १५ सप्टेंबर २०१६ रोजी गणेशोत्सव काळात कनाननगर येथे राहण्यास आला होता. १९ सप्टेंबरला आई-वडील व्यवसायानिमित्त बाहेर गेले होते. मुलगी व आजोबा असे दोघेच घरी होते. यावेळी दुपारी ती झोपलेली पाहून आजोबाने तिच्यावर अत्याचार केला. त्यानंतर मुलीला घरी कोणाला सांगितलेस तर ठार मारण्याची धमकी दिली. त्यामुळे भीतीने मुलीने घडलेला प्रकार सांगितला नाही. त्यानंतर दुसऱ्या दिवशीही तिच्यावर अत्याचार केला. रात्री आई-वडील घरी आल्यानंतर मुलगी रडत असल्याचे दिसून आले. त्यांनी तिच्याकडे विचारपूस केली असता तिने घडलेला प्रकार सांगितला. मुलीच्या जीविताला धोका असल्याने अखेर मुलीच्या आईने सासऱ्याच्या विरोधात शाहूपुरी पोलीस ठाण्यात फिर्याद दिली. पोलिसांनी संशयित नराधम आदमाने याला रांगोळी येथील घरातून अटक केली. या प्रकरणी तत्कालीन सहायक पोलीस निरीक्षक तृप्ती देशमुख यांनी तपास पूर्ण करून दोषारोपपत्र न्यायालयात सादर केले असता न्यायालयाने त्याला जन्मठेप व १० हजार रुपये दंडाची  शिक्षा ठोठावली आहे . 
 



  Print






News - Rajy | Posted : 2018-10-27






Related Photos