महत्वाच्या बातम्या

 खेळाडूंच्या आगमनाने आनंदवन फुलले : डॉ. विकास आमटे


- राज्यस्तरीय व्हॉलीबॉल स्पर्धेतच्या उद्घाटन प्रसंगी प्रतिपादन 

विदर्भ न्यूज एक्सप्रेस 

तालुका प्रतिनिधी / वरोरा : आनंदवनात अनेक उपक्रम होत असतात .सामाजिक, सांस्कृतिक आणि क्रीडा उपक्रमांना आनंदवनात अग्रस्थान दिले जाते. आज संपूर्ण महाराष्ट्र राज्यातून अनेक व्हॉलीबॉल खेळाडू आनंदवनात आले. यामुळे आनंदवन फुलून गेल्याचे प्रतिपादन ज्येष्ठ समाजसेवक डॉक्टर विकास आमटे यांनी केले. स्फूर्ती स्पोर्टिंग क्लब, वरोरा आणि महारोगी सेवा समिती आनंदवन यांच्या संयुक्त विद्यमाने आयोजित राज्यस्तरीय आंतर जिल्हा वरिष्ठ गट व्हॉलीबॉल अजिंक्यपद स्पर्धेच्या उद्घाटन प्रसंगी ते बोलत होते.

याप्रसंगी अध्यक्षस्थानी आमदार प्रतिभा धानोरकर तर प्रमुख पाहुणे म्हणून आनंदवनाच्या विश्वस्त रेणुका विलास मनोहर, महाराष्ट्र राज्य व्हॉलीबॉल संघटनेचे अध्यक्ष विजय डांगरे, आनंदिकेतन महाविद्यालयाचे प्राचार्य डॉक्टर मृणाल काळे, महाराष्ट्र राज्य व्हॉलीबॉल असोसिएशनचे सचिव संजय नाईक, स्फूर्ती स्पोर्टिंग क्लब चे अध्यक्ष डॉक्टर आर. आर. महाजन, पंचायत समितीचे गटविकास अधिकारी संदीप गोडसेलवार, दिशा जुनियर कॉलेजचे प्राचार्य संदीप डाखरे, माजी नगराध्यक्ष अहतेश्याम अली, महाराष्ट्र व्हॉलीबॉल पंच समितीचे अध्यक्ष पी. एस. पंत, चंद्रपूर व्हॉलीबॉल संघटनेचे अध्यक्ष प्रमोद आवटे, सचिव सुनील आखाडे आणि व्हॉलीबॉल संघटनेचे जेष्ठ पदाधिकारी सुनील हांडे यांचेसह अनेक मान्यवरांची उपस्थिती व्यासपीठावर होती.

वरोरा हे शहर क्रीडा क्षेत्रात अग्रेसर असल्याचे सांगत आमदार प्रतिभा धानोरकर यांनी  व्हॉलीबॉल स्पर्धेच्या देखण्या आयोजनाबद्दल आयोजकांची कौतुक केले. वरोरा शहरात व्हॉलीबॉल, कबड्डी आदी खेळाचे आयोजन मोठ्या प्रमाणात केले जाते. यामुळे खेळाडूंमध्ये उत्साह असतो शिवाय स्पर्धांचा दर्जा उत्तम असल्यामुळे राष्ट्रीय स्तरावरचे खेळाडू यामध्ये सहभागी होतात असे त्या म्हणाल्या. सुनील हांडे यांनी आपले मनोगत याप्रसंगी व्यक्त केले.          

कार्यक्रमाच्या सुरुवातीला मान्यवरांच्या हस्ते मैदानाचे पूजन करून फटाक्यांची आतिषबाजी करण्यात आली. भव्य मंचावर हा उद्घाटन सोहळा पार पडला तर आनंदनिकेतन महाविद्यालयाच्या विद्यार्थ्यांनी मलखांब चे प्रात्यक्षिक करून उपस्थितांची मने जिंकली. या प्रसंगी वरोरा शहरातून खेळाडूंची भव्य रॅली काढण्यात आली. यामध्ये रोटरी आणि रोट्रॅक्ट क्लबने खेळाडूंना फळांच्या रसाचे वाटप केले, तर उद्घाटन सोहळ्यानंतर आनंदवनातील दिव्यांग कलावंतांचा स्वरानंदनवन या वाद्य वृंदाचा आस्वाद उपस्थितांनी घेतला.

या स्पर्धांकरिता चार मैदाने सज्ज करण्यात आली, असून वरिष्ठ गटातील  महिलांचे 30 संघ व पुरुषांचे 35 संघ यात सहभागी झाले आहेत. दिवस- रात्र हे सामने आनंद निकेतन महाविद्यालयाच्या मैदानावर खेळविले जाणार आहेत.

कार्यक्रमाचे सूत्रसंचालन अमोल यांनी केले. तत्पूर्वी मान्यवरांच्या हस्ते मशाल पेटवून स्पर्धांना सुरुवात करण्यात आली आणि खेळाडूंना शपथ देण्यात आली. प्रास्ताविक राजू दोडके यांनी तर आभार विनोद पद्मावार यांनी  मानले. 





  Print






News - Chandrapur




Related Photos