चंद्रपूरमध्ये आढळले पुन्हा नऊ कोरोनाबाधित रुग्ण : एकूण रुग्णसंख्या झाली बारा


विदर्भ न्यूज एक्सप्रेस 
प्रतिनिधी / चंद्रपूर : 
जिल्ह्यात आज गुरुवार २१  मे ला पुन्हा नऊ जणांचा कोरोनाचा अहवाल हा पॉझिटिव्ह आला आहे यामुळे जिल्ह्यातील आधी तीन रुग्ण पकडून एकूण रुग्ण संख्या बारा झाली आहे. जिल्हा शल्य चिकित्सक निवृत्ती राठोड यांनी दिलेल्या वृत्तानुसार रात्री उशिरा नागपूर येथून प्राप्त झालेल्या अहवालामध्ये नऊ पॉझिटिव्ह रुग्ण आढळून आले आहेत. हे नऊ  रुग्ण संस्थात्मक अलगीकरणात आहेत. यापैकी ५  जण वैद्यकीय महाविद्यालयात चंद्रपूर येथे उपचार घेत आहेत. तर ४ जण वन अकादमीच्या नव्या इमारतीत संस्थात्मक अलगीकरणात आहेत. एकावेळी ९ कोरोना बाधित रुग्णांची वाढ झाल्याने जिल्हा प्रशासनाची डोकेदुखी वाढलेली आहे . 
वन अकादमीमध्ये १९  मे रोजी संस्थात्मक अलगीकरण करण्यात आलेले चार नागरिक नाशिक मालेगाव एमआयडीसीमध्ये काम करीत होते. भंडारा जिल्हाधिकारी कार्यालयाने हे चार नागरिक पॉझिटिव्ह रुग्णाच्या संपर्कात आल्याचा संशय व्यक्त केला होता. त्यामुळे वन अकादमी मध्ये ठेवण्यात आले होते. हे चार नागरिक चिरोली ( मूल ), जाम (पोंभुर्णा ), विसापूर ( चंद्रपूर ), विरवा ( सिंदेवाही ) परिसरातील आहे. तर  पुणे येथून आलेले पती-पत्नी वरोरा येथे यापूर्वी संस्थात्मक अलगीकरणात होते. तसेच जिल्ह्यातील ताडाळी परिसरातील एक २०  वर्षीय मुलगी, आरवट येथील २१  वर्षाचा युवक ठाण्यावरून परत आला तर ब्रह्मपुरी तालुक्यातील २१  वर्षीय युवक दिल्लीवरून परत आला यांचा वैद्यकीय महाविद्यालयात उपचार सुरु आहे. 
हे सर्व रुग्ण संस्थात्मक अलगीकरणात ( इन्स्टिट्यूशनल कॉरेन्टाइन ) आहेत. १९ मे रोजी यांचे स्वॅब घेण्यात आले होते. सर्व नागरिक बाहेरून आले असून त्यांच्यावर योग्य उपचार सुरू आहे. नागरिकांनी घाबरून जाऊ नये असे आवाहन, जिल्हाधिकारी डॉ. कुणाल खेमनार यांनी केले आहे.



  Print






News - Chandrapur | Posted : 2020-05-21






Related Photos