कोरोना लॉकडाऊनमध्ये गडचिरोली शहरातील जुगार अड्ड्यावर धाड ; ११ जुगाऱ्यांना केली अटक, ५ लाख ३२ हजारांचा मुद्देमाल जप्त


- जुगाऱ्यांमध्ये व्यावसायिक, राजकीय पदाधिकाऱ्यांचा समावेश, गडचिरोली जिल्हा पोलिस दलाच्या स्थानिक गुन्हे शाखेची कारवाई

विदर्भ न्यूज एक्सप्रेस
प्रतिनिधी / गडचिरोली :
गडचिरोली जिल्हा पोलिस दलाच्या स्थानिक गुन्हे शाखेने गडचिरोली शहरातील आशीर्वादनगरात ७ मे रोजी रात्री सुरू असलेल्या मोठया जुगार अड्ड्यावर धाड टाकली. याप्रकरणी ११ जुगाऱ्यांना अटक करून गडचिरोली पोलिस ठाण्यात गुन्हा दाखल केला आहे. त्यात शहरातील काही व्यावसायिक, राजकीय पदाधिकारी व कार्यकर्त्यांचा समावेश आहे. या कारवाईदरम्यान ५ लाख ३२ हजार ७३५ रुपयांचा मुद्देमाल जप्त करण्यात आला आहे. या कारवाईमुळे शहरात मोठी खळबळ उडाली असून जुगाऱ्यांमध्ये भीतीचे वातावरण पसरले आहे. सद्या सर्वत्र कोरोनाच्या प्रादुर्भावामुळे लॉकडाऊन करण्यात आले असून या काळातही जुगार अड्डे सुरु असल्याचे चित्र या घटनेमुळे दिसून येत आहे. गडचिरोली शहरातील आशीर्वादनगर परिसरातील प्रवीण प्रमोद रक्षमवार यांच्या घरी हा जुगार अड्डा ७ मे रोजी रात्रीच्या सुमारास सुरू होता. याबाबतची गोपनीय माहिती गडचिरोली जिल्हा पोलिस दलाच्या स्थानिक गुन्हे शाखेला मिळाली. त्यानुसार स्थानिक गुन्हे शाखेच्या पथकाने रक्षमवार यांच्या घरी धाड टाकली. तिथे जुगार सुरू असताना ही कारवाई करण्यात आली. याप्रकरणी प्रवीण प्रमोद रक्षमवार (३२), सुभाष समय्या उप्पलवार (२७), मिथुन महेंद्र रणदिवे (३६), अमित प्रदीप इंदूरकर (२८), योगेश महेंद्र रणदिवे (३२), विजय ज्ञानेश्वर वागुलकर (३०), , दिनेश नामदेव भगत (४५), कपिल गजानन चावके (३२), जगदीश रामचंद्र डोंबळे (३०) यांच्यावर गडचिरोली पोलिस ठाण्यात गुन्हा दाखल करून जुगाऱ्यांना अटक करण्यात आली आहे. या कारवाईदरम्यान ५ लाख ३२ हजार ७३५ रुपयांचा माल जप्त करण्यात आला आहे. यामध्ये जुगाराच्या डावावर लावलेली १६ हजार २१ रुपये रोख रक्कम, जुगाराच्या डावात वापरण्यासाठी या ११ जणांकडे असलेली एकत्रित १ लाख २९ हजार ५०० रुपयांची रोख रक्कम, १ लाख ६० हजार रुपये किंमतीच्या ४ दुचाकी, २ लाख २७ हजार रुपये किंमतीचे १२ मोबाईल संच व ११५ रुपये किंमतीच्या अन्य साहित्यांचा समावेश आहे. सदर कारवाई पोलिस निरीक्षक उल्हास भुसारी, पोलिस निरीक्षक प्रदीप चौगावकर, पोलिस हवालदार कुलदीप गौरकर, सहायक पोलिस निरीक्षक विक्रांत सगणे, पोलिस उपनिरीक्षक भागवत कदम, सहायक फौजदार गंगाधर भोयर, सहायक फौजदार दादाजी करकाडे, पोलिस हवालदार भाऊराव बोरकर, पोलिस शिपाई मंगेश राऊत, पोलिस शिपाई माणिक दुधबळे, पोलिस शिपाई सुनील पुट्टावार, चालक पोलिस शिपई माणिक निसार, महिला पोलिस शिपाई पुष्पा कन्नाके, पोलिसशिपाई पंकज भगत यांनी केली आहे.




  Print






News - Gadchiroli | Posted : 2020-05-08






Related Photos