देसाईगंज येथील इसमाची हत्या करुन मृतदेह फेकला शेतात
-रेल्वे पटरी पासून काही अंतरावर आढळला मृतदेह
विदर्भ न्यूज एक्सप्रेस
शहर प्रतिनिधी / देसाईगंज : शहरातील इसमाची अज्ञाताने हत्या करुन मृतदेह शेतात टाकून दिल्याची घटना ५डिसेंबर रोजी दुपारी ०१.३० ते २.०० वाजताच्या सुमारास उघडकीस आली. सदर घटनेने शहरात एकच खळबळ उडाली आहे. अरुण संपत कोवे वय ५३ रा. शिवाजीवार्ड देसाईगंज वडसा, जि. गडचिरोली, असे मृतकाचे नाव आहे. देसाईगंज येथील रेल्वे स्थानकापासून १ किमी अंतरावर गोंदिया कडे जाणाऱ्या रेल्वे पटरीपासून अंदाजे १०० फुटावर असलेल्या बाबुळच्या झाडाखाली शेतीच्या धुऱ्यावर अरुण कोवे यांचा मृतदेह ५ डिसेंबर रोजी दुपारी ०१.३० ते २.०० वाजताच्या सुमारास आढळून आला. घटनेची माहिती तात्काळ देसाईगंज पोलिसांना देण्यात आली असता, कुरखेडा उपविभागीय पोलीस अधिकारी व देसाईगंज पोलीस स्टेशनचे पोलीस निरीक्षक यांनी घटनास्थळ गाठून पंचनामा केला. सदर घटनेबाबत मृतकाच्या मुलाने आपल्या वडिलास अज्ञाताने डोक्यावर कोणत्यातरी हत्याराने वार करून हत्त्या केली, अशी फिर्यात पोलीस ठाण्यात दाखल केली असता, पोलिसांनी अज्ञाताविरुद्ध गुन्हा दाखल करून तपासात घेतला आहे. पुढील तपास उपविभागीय पोलीस अधिकारी कुरखेडा व पोलीस निरीक्षक महेश मेश्राम यांच्या मार्गदर्शनाखाली पोलीस उपनिरीक्षक ज्ञानेश्वर लाडे करीत आहे.
News - Gadchiroli