जांभुळखेडा घटनेचा सूत्रधार कुख्यात नक्षल डीव्हीसीएम दिनकर गोटा याच्यासह दोघांना अटक, १४ दिवसांची पोलीस कोठडी


- १८ लाखांचे बक्षिस केले होते जाहीर, गडचिरोली पोलीस दलास मोठे यश

- पोलीस अधीक्षक शैलेश बलकवडे यांनी पत्रकार परिषदेत दिली माहिती

विदर्भ न्यूज एक्सप्रेस
प्रतिनिधी / गडचिरोली :
जांभुळखेडा घटनेचा सूत्रधार कुख्यात नक्षल डीव्हीसएम दिनकर गोटा व कोरची दलमच्या सदस्य पदावर कार्यरत असलेली महिला नक्षली सुनंदा कोरटी यांना आज पहाटे अटक करण्यात गडचिरोली पोलीस दलास यश आल्याची माहिती पोलीस अधीक्षक शैलेश बलकवडे यांनी आज येथे आयोजित पत्रकार परिषदेत दिली आहे. कुरखेडा तालुक्यातील दादापूर येथे नक्षलवाद्यांनी ३५ वाहने जाळली होती. त्यानंतर १ मे २०१९ ला नक्षल्यांनी भूसुरूंग स्फोट घडवून आणला. यामध्ये गडचिरोली पोलीस दलाचे १५ जवान व १ खाजगी वाहन चालक शहीद झाले होते. या घटनेतील मुख्य सूत्रधारापैकी एक असलेला व त्यावेळी नक्षलवाद्यांच्या उत्तर गडचिरोली विभागीय कमिटीचा तसेच कोरची दलमच्या डीव्हीसीएम पदावर कार्यरत असलेला दिनकर गोटा व कोरची दलमच्या सदस्य पदावर कार्यरत असलेली महिला नक्षली सुनंदा कोरटी यांना पोलीस अधीक्षक शैलेश बलकवडे यांना मिळालेल्या गोपनीय माहितीवरून गडचिरोली पोलीस दलाच्या विशेष तपास पथकाने आज पहाटे गडचिरोली पोलीस स्टेशनच्या हद्दीत अटक केली. नक्षलवादी दिनकर गोटा हा सन २००५ मध्ये नक्षलवाद्यांच्या टिपागड दलममध्ये सदस्य पदावर कार्यरत होता. यानंतर २००६ मध्ये चातगाव दलम, २००७ मध्ये टिपागड दलमचा एरिया कमिटी मेंबर, २००८ मध्ये धानोरा दलममध्ये कमांडरपदावर, २०११ मध्ये टिपागड दलमचा एरिया कमिटी सचिव, २०१६ पासून कोरची दलममध्ये उत्तर गडचिरोली डीव्हीजनच्या विभागीय समिती सदस्य पदावर तो कार्यरत होता. एकुणच गडचिरोली जिल्ह्रूाच्या उत्तर भागात त्याची पकड होती. दिनकर गोटा याच्यावर गडचिरोली पोलीस दलातील विविध पोलीस स्टेशन, उपपोलीस स्टेशन व पोलीस मदत केंद्र येथे एकुण १०८ गंभीर स्वरूपाचे गुन्हे दाखल आहेत. यात ३३ खुनांचा समावेश आहे. त्याचबरोबर २००९ साली मरकेगाव चकमकीत त्याचा सहभाग होता. दादापूर येथील वाहनांची जाळपोळ व १ मे २०१९ रोजी जांभुळखेडा येथे भूसुरूंग स्फोट घडविण्यात तो मुख्य सूत्रधार आहे. या ठिकाणांची रेकी व प्लॅनिंगमध्ये त्याचा सक्रिय सहभाग होता. शासनाने दिनकर गोटा याच्यावर एकुण १६ लाख रुपयांचे बक्षिस जाहीर केले होते. तसेच नक्षली सुनंदा कोरेटी २००९ मध्ये नक्षल दलममध्ये भरती झाली. सध्या ती नक्षवाद्यांच्या कोरची दलम सदस्य पदावर कार्यरत होती. तिच्यावर एकुण ३८ गंभीर गुन्ह्यांची नोंद आहे. शासनाने तिच्यावर एकुण २ लाख रूपयांचे बक्षीस जाहीर केले होते.
२८ फेब्रुवारी २०२० रोजी पोलीस अधीक्षक शैलेश बलकवडे यांच्यासमोर उत्तर गडचिरोली विभागीय समिती सदस्य पदावर कार्यरत असलेला विलास कोल्हा याने एके ४७ शस्त्रासह आत्मसमर्पण केले होते तर नुकतेच चातगाव दलम कामंडरसह संपुर्ण चातगाव दलमने आत्मसमर्पण केले होते. जांभुळखेडा घटनेतील ८ आरोपींना गडचिरोली पोलीस दलाने यापूर्वीच अटक केलेली असून घटनेचा संपुर्ण तपास करून पुढील तपास एनआयएकडे हस्तांतरित करण्यात आला होता. यानंतर आज गडचिरोली पोलीस दलाने नक्षल्यांच्या उत्तर गडचिरोली डीव्हीजनचा विभागीय समितीचा सदस्य असलेल्या व दादापूर, जांभुळखेडा घटनेचा कट रचण्यात व कटाची अंमजबजावणी करण्यात प्रमुख भुमिका बजावलेल्या कुख्यात नक्षली दिनकर गोटा यास अटक केल्याने उत्तर गडचिरोली भागात नक्षलवाद्यांना जबर धक्का देण्यात गडचिरोली पोलीस दलाने यश मिळविले आहे. नक्षली दिनकर गोटा व सुनंदा कोरेटी यांना आज दादापूर येथील वाहन जाळपोळ प्रकरणी पुराडा पोलीस स्टेशन येथे २०/२०१९ कलम ४३५, १४३, १४७, १४८, १४९, १२० (ब) भादंवि सहकलम ५/२८ भाहका, १३५ मपोका १६, १८, २०, २३ युएपी ॲक्टनुसार दाखल गुन्ह्यात अटक करून न्यायालयात हजर केले असता न्यायालयाने दोघांनाही १४ दिवसांची पोलीस कोठडी सुनावली आहे. दिनकर गोटा सप्टेंबर २०१९ मध्ये एका नक्षल महिलेसह दलममधून निघून गेल्याबाबतची माहिती गडचिरोली पोलीस दलास मिळाली होती. यानंतर सातत्याने गडचिरोली पोलीस दल नक्षली दिनकर गोटा याच्या मागावर होते. अखेर आज गडचिरोली पोलीस दलाला जहाल नक्षली दिनकर गोटा व सुनंदा कोरेटी यांना जेरबंद करण्यात यश प्राप्त झाले. दिनकर गोटाच्या अटकेमुळे १ मे २०१९ रोजी जांभुळखेडा घटनेतील शहीद जवानांना न्याय मिळाल्याची भावना व्यक्त केली जात आहे. पोलीस अधीक्षक बलकवडे यांनी नक्षलवाद्यांना आत्मसमर्पण करण्याचे आवाहन केले आहे. त्याचबरोबर गडचिरोली पोलीस दल नक्षलविरोधी अभियान आणखी तीव्र करण्याचे संकेत दिले आहेत. तसेच दिनकर गोटा यास अटक करणाऱ्या विशेष पोलीस तपास पथकाचे पोलीस अधीक्षक बलकवडे यांनी अभिनंदन केले असून विशेष पोलीस पथकास पारितोषिक जाहीर केले आहे.



  Print






News - Gadchiroli | Posted : 2020-03-04






Related Photos