जम्मू-काश्मीरमध्ये पोलीस उपअधिक्षक दोन अतिरेक्यांसोबत कारमध्ये सापडला


विदर्भ न्यूज एक्सप्रेस 
वृत्तसंस्था / श्रीनगर :
जम्मू-काश्मीरच्या कुलगाममध्ये चेकिंग सुरू असताना हिजबुल मुजाहिद्दीन या दहशतवादी संघटनेच्या दोन अतिरेक्यांसोबत जम्मू-काश्मीर पोलीस दलाचा पोलीस उपअधिक्षकच आढळून आल्याने खळबळ उडाली आहे. या पोलीस उपअधिक्षकाला अटक करण्यात आली असून अतिरेक्यासोबतच्या त्याच्या संबंधाबाबत कसून चौकशी करण्यात येत आहे. विशेष म्हणजे या पोलीस उपअधिक्षकाला राष्ट्रपती पदक पुरस्कारानेही गौरवण्यात आलेलं आहे.
देविंदर सिंह असं या पोलीस अधिक्षकाचं नाव असून ते एअरपोर्ट सिक्युरीटीसाठी तैनात होते. त्यांना सुरक्षा दलाच्या जवानांनी ताब्यात घेतलं आहे. त्यांच्यासोबतच्या दोन अतिरेक्यांनाही ताब्यात घेण्यात आलं आहे. सैय्यद नवीद मुश्ताक उर्फ नवीद बाबू असं एका अतिरेक्याचं नाव असून दहशतवादी संघटनांमध्ये अतिरेकी रियाज नाइकूनंतर त्याचा नंबर लागत असल्याचं सुरक्षा दलाच्या सूत्रांनी सांगितलं. दुसऱ्या अतिरेक्याचं नाव आसिफ राथर असं आहे. पोलिसांनी या तिघांनाही कुलगाम जिल्ह्यातील काजीगुंडच्या मीर बाजार परिसरात अटक केली. नाविद हा हिजबुल मुजाहिद्दीनचा टॉप कमांडर आहे. तर राथर हा तीन वर्षांपूर्वीच दहशतवादी संघटनेमध्ये सहभागी झाल्याचं कळतं. हे दोन्ही दहशतवादी शोपियांमधील रहिवासी आहेत.
या दोन्ही दहशतवाद्यांसोबत कारने जात असलेले पोलीस उपअधिक्षक देविंदर सिंह यांना गेल्यावर्षी १५ ऑगस्ट रोजी राष्ट्रपती पुरस्काराने गौवरविण्यात आलं होतं. त्यावेळी ते जम्मू-काश्मीर पोलिसांच्या एन्ट्री हायजॅकिंग पथकात कार्यरत होते. आता त्यांची नियुक्ती श्रीनगर आंतरराष्ट्रीय विमानतळावर करण्यात आली होती. यापूर्वी २००१मधील संसदेवरील हल्ल्यानंतर त्यांचे नाव चर्चेत आले होते. त्यावेळी ते पोलीस निरीक्षक म्हणून स्पेशल ऑपरेशन ग्रुपमध्ये कार्यरत होते. अँटी टेरर ऑपरेशन नंतर त्यांना पोलीस उपअधिक्षकपदी बढती देण्यात आली होती.
अतिरेक्यांना काश्मीर खोऱ्यातून बाहेर पडण्यासाठी देविंदर सिंह मदत करत होते, असा त्यांच्यावर आरोप आहे. सूत्रांच्या माहितीनुसार अतिरेक्यांना दिल्लीत घेऊन जाण्यासाठी देविंदर सिंह मदत करत होते. दरम्यान, सिंह यांना अटक केल्यानंतर तात्काळ त्यांच्या घरी छापा मारण्यात आला असता त्यांच्या घरी ५ ग्रेनेड आणि ३ एके ४७ सापडल्या आहेत. पोलीस उपमहानिरीक्षक अतूल गोयल यांच्या नेतृत्वाखाली ही मोठी कारवाई करण्यात आली.



  Print






News - World | Posted : 2020-01-12






Related Photos