बाबरी मशिद उभारणीसाठी पाच एकर जागा देण्याचे सर्वोच्च न्यायालयाने दिले आदेश


विदर्भ न्यूज एक्सप्रेस 
वृत्तसंस्था / उत्तर प्रदेश :
अयोध्येतील पंचकोसी परिक्रमेच्या परिघाबाहेर उत्तर प्रदेश सरकारनं सुन्नी वक्फ बोर्डाला मशिदीसाठी जमिनीचा प्रस्ताव दिला आहे. पंचकोसी परिक्रमेबाहेरील पाच जागा मशिदीसाठी सुचवण्यात आल्या आहेत. तसंच केंद्रीय गृह मंत्रालयाच्या परवानगीसाठी या जागांची यादीदेखील पाठवण्यात आली आहे. सर्वोच्च न्यायालयानं ९ नोव्हेंबर रोजी मशिदीच्या उभारणीसाठी पाच एकर जागा देण्याचे आदेश दिले होते.
अयोध्येनजीक असलेल्या महामार्गाजवळील पाच जागा मशिदीसाठी सुचवण्यात आल्याची माहिती सूत्रांकडून देण्यात आली आहे. टाइम्स ऑफ इंडियानं यासंदर्भातील वृत्त दिलं आहे. दरम्यान, सुचवण्यात आलेल्या जमिनीची यादी केंद्रीय गृहमंत्रालयाकडे पाठवण्यात आली आहे. सूत्रांनी दिलेल्या माहितीनुसार अयोध्या-फैजाबाद महामार्ग, अयोध्या-बस्ती रोड, अयोध्या-सुल्तानपुर रोड, अयोध्या-गोरखपूर रोड, आणि आणखी एक जागा सुचवण्यात आली आहे. या जागा पंचकोसी परिक्रेमेच्या परिघाबाहेर बाहेर निश्चित करण्यात आल्या आहेत. हिंदू आणि मुस्लीम समाजाचे उत्सव एकाच वेळी आल्यास कोणतीही अडचण येऊ नये यासाठी या जागा सुचवण्यात आल्याचं सूत्रांकडून सांगण्यात आलं.
महामार्गानजीक असलेली जमिन मशिदीसाठी उत्तम पर्याय असल्याची माहिती सूत्रांनी दिली. शहराचा सर्वाधिक भाग हा पंचकोसी परिक्रमेच्या परिघात येत असून अशा परिस्थितीत यापेक्षा अन्य पर्याय निवडणं अशक्य असल्याचं सूत्रांचं म्हणणं आहे.
९ नोव्हेंबर रोजी सर्वोच्च न्यायालयानं या प्रकरणी निकाल देत वादग्रस्त जमिन राम मंदिरासाठी देण्याचा निर्णय दिला होता. तसंच मशिदीच्या उभारणीसाठी ५ एकर जागा देण्याचे आदेश दिले होते. या निर्णयाला मुस्लिम पर्सनल लॉ बोर्डानं विरोध केला होता. मशिदीसाठी पर्यायी पाच एकर जमीन स्वीकारण्यासही विरोध असल्याचं मुस्लीम पर्सनल लॉ बोर्डाचे सरचिटणीस जफरयाब जिलानी यांनी स्पष्ट केलं होतं. दरम्यान, सरकारनं दिलेला प्रस्तावावर सुन्नी वक्फ बोर्डाकडून अद्याप निर्णय घेण्यात आलेला नाही. 



  Print






News - World | Posted : 2019-12-31






Related Photos