बिबट्याच्या मृत्यू प्रकरणात वन विभागाने घेतले आठ जणांना ताब्यात


विदर्भ न्यूज एक्सप्रेस 
वृत्तसंस्था / वर्धा :
मांडवा शिवारात झालेल्या बिबट्याच्या मृत्यू प्रकरणात वन विभागाने आठ जणांना ताब्यात घेतले आहे. त्यांच्याकडून बिबट्याचे अवयव हस्तगत करण्यात आले आहेत. वागदरा आणि बेलगाव येथील हे आरोपी आहेत.
सध्या वर्ध्यात राहणारे बेलगाव येथील गोविंद केकापुरे यांच्या शेतात बुधवारी पहाटे पाच वाजता कुंपणाच्या फासाला बिबट्या अडकला होता. बिबट्या अडकल्याची माहिती शेतमालकाला मिळाली. त्याची विल्हेवाट लावण्यासाठी वागदरा येथील काही जणांच्या साहाय्याने कावड बनवून शेतापासून एक किलोमीटर अंतरावर बिबट्याचा मृतदेह नेण्यात आला. तेथे आरोपींनी मृतदेहाचे अवयव कापून झुडपात फेकून दिले. वागदरा टेकडीजवळ गुरुवारी या बिबट्याचा मृतदेह आढळला. शिकार झाली असल्याचा प्राथमिक अंदाज वन विभागाने व्यक्त केला होता. वन विभागाने तपासाची चक्रे वेगात फिरवित या प्रकरणाचा छडा लावला. अवघ्या पाच तासांत गोविंद केकापुरे (बेलगाव), नरेश कासार, मंगल मानकर, महेश आमझोरे, राहुल कासार, नरेंद्र कासार, गुड्डू उर्फ प्रवीण बोरघाटे, राजू कासार सर्व राहणार वागदरा यांना ताब्यात घेतले. त्यांच्याकडून बिबट्याचे मुंडके, तीन पाय, शेपूट तसेच नखे असे अवयव जप्त करण्यात आले आहेत. या प्रकरणाचा मुख्य सूत्रधार कोण, हा प्रश्न अजूनही अनुत्तरीत आहे. आणखी आरोपी वन विभागाला गवसण्याची शक्यता आहे. आरोपींचा शोध अजून सुरूच आहे.
गुरुवारी सायंकाळी बिबट्याच्या मृतदेहावर अंत्यसंस्कार केल्यानंतर वन विभागाने आरोपींची धरपकड सुरू केली. शेतमालक गोविंद केकापुरे याला ताब्यात घेतल्यावर इतर आरोपींची नावे पुढे आली. गुरुवारी रात्री दहाच्या सुमारास आरोपींना पकडण्यात वन विभागाला यश आले. या प्रकरणात घटनास्थळावर आणलेल्या बादल नामक श्वानाचा आरोपी शोधण्यात वन विभागाला बराच फायदा झाला.
आरोपीने मृतदेहाच्या काढलेल्या अवयवांची किंमत लाखो रुपयाच्या घरात आहे. या प्रकरणात मेट्रो शहरात आरोपींनी संपर्क करून काही माहिती घेतली होती काय, आंतरराष्ट्रीय बाजाराशी या घटनेचा काही संबंध आहे काय याबाबत वन विभाग पडताडणी करीत आहे. सूत्रांकडून मिळालेल्या माहितीनुसार अंधश्रद्धेमधून अवयव कापण्याचा प्रकार घडला असल्याची माहिती आहे. शकुन-अपशकुन यासाठी या अवयवाचा वापर होतो, अशीही चर्चा आहे.



  Print






News - Nagpur | Posted : 2019-12-14






Related Photos