उन्नाव पिडीतेवर अंत्यसंस्कार : बहिणीला शासकीय नोकरी, घर, शस्त्र परवाना


विदर्भ न्यूज एक्सप्रेस 
वृत्तसंस्था / उन्नाव :
उत्तर प्रदेशच्या उन्नाव जिल्ह्यात बलात्कारानंतर जिवंत जाळलेल्या तरूणीवर आज रविवारी  अंत्यसंस्कार करण्यात आले. शनिवारी संध्याकाळी मृतदेह दिल्लीहून आल्यानंतर सीएम योगी आदित्यनाथ यांना बोलवावे अशी मागणी पीडित कुटुंबीयांकडून केली जात होती. अनेक तासांच्या प्रशासनानंतर अखेर कुटुंबीय सहमत झाले आणि पीडितेला दफन करण्यात आले. यावेळी तेथे उपस्थित असलेल्या हजारो लोकांचे डोळे पाणावले होते. दोषींना कठोर शिक्षा व्हावी, अशी प्रत्येक उपस्थितांची मागणी होती. दरम्यान, पीडितेच्या बहिणीला सरकारी नोकरी देण्यात येणार आहे. तर, तिच्या भावाला शस्त्र परवानाही देण्यात येणार आहे, अशी घोषणा सरकारतर्फे करण्यात आली आहे.
आपण आपल्या मुलीच्या शवास अग्नी देणार नसून त्याचे दफन करू असे पीडितेच्या वडिलांनी जाहीर केले होते. माझ्या मुलीला अगोदरच जाळण्यात आले आहे, त्यामुळे मी आता तिला पुन्हा जाळणार नाही, असे तिच्या वडिलांनी म्हटले होते. त्यानुसार, कडक सुरक्षेत पीडितेचे गावाबाहेरील एका मोकळ्या जागेवर दफन करण्यात आले आहे.
दरम्यान, लखनऊचे आयुक्त मुकेश मेश्राम यांनी पीडितेच्या बहिणीला नोकरी देण्यात येईल, अशी घोषणा केली आहे. या व्यतिरिक्त पंतप्रधान आवास योजनेंतर्गत दोन घरे कुटुंबास देण्यात येणार आहेत. यापूर्वी पीडितेच्या कुटुंबाला राज्य सरकारने २५ लाख रुपयांची भरपाईही दिली होती. दोषींवर कठोर कारवाई केली जाईल, असेही मेश्राम यांनी यावेळी सांगितले.
पीडित मुलीची बहीण आणि इतर कुटुंबातील सदस्यांना २४ तास सुरक्षा पुरविली जाईल, असे मेश्राम यांनी सांगितले. पीडितेच्या भावाच्या मागणीनुसार त्याला स्वसंरक्षणासाठी शस्त्र परवाना देण्यात येणार आहे. पीडितेच्या बहिणीने आपल्याला सरकारी नोकरीची मिळावी अशी मागणी केली होती. सरकारने ही मागणी मान्य केली आहे. खेड्यातील तणाव लक्षात घेता अंतिम संस्कारादरम्यान पोलिसांची मोठी कुमक मागवण्यात आली होती.
कायदा व सुव्यवस्था पाहता उन्नाव येथून सीतापूर, हरदोई आणि लखनऊ येथून पोलिसांची कुमक मागवण्यात आली होती. याशिवाय घटनास्थळावर देखील चोख बंदोबस्त ठेवण्यात आला होता. दरम्यान, यूपीच्या योगी आदित्यनाथ सरकारने फास्ट ट्रॅक कोर्टात या प्रकरणाची सुनावणी घेण्याचा निर्णय घेतला आहे.
मुख्यमंत्री जो पर्यंत येथे येत नाहीत तो पर्यंत मी माझ्या बहिणीचे अंत्यसंस्कार करणार नाही, असे बलात्कार पीडितेच्या बहिणीने यापूर्वी माध्यमांना सांगितले होते. मला मुख्यमंत्री योगी यांच्याशी वैयक्तिकरित्या बोलायचे आहे. मला आरोपीला फाशी द्यावी अशी माझी इच्छा आहे. तथापि, प्रशासनाने मन वळवल्यानंतर माझे कुटुंबीय सहमत झाले आणि माझ्या बहिणीवर अंत्यसंस्कार करण्यात आले, असे पीडितेची बहीण म्हणाली.



  Print






News - World | Posted : 2019-12-08






Related Photos