केंद्रीय कर्मचाऱ्यांसाठी आनंदवार्ता ; निवृत्तीचे वय साठ वर्षेच राहणार


विदर्भ न्यूज एक्सप्रेस 
वृत्तसंस्था / नवी दिल्ली :
केंद्रीय कर्मचाऱ्यांसाठी आनंदवार्ता आहे. कर्मचाऱ्यांचे निवृत्तीचे वय साठ वर्षेच राहणार आहे. निवृत्तीचं वय ६० वरून ५८ वर्षे करण्याचा कोणताही प्रस्ताव नाही, असं सरकारनं स्पष्ट केलं आहे. केंद्रीय राज्यमंत्री जितेंद्र सिंह यांनी लोकसभेत लेखी उत्तरात ही माहिती दिली. सध्या तरी केंद्रीय कर्मचाऱ्यांच्या निवृत्तीचं वय ६० वरून ५८ वर्षे करण्याचा कोणताही प्रस्ताव नाही, असं त्यांनी सांगितलं आहे.
१ एप्रिल २०२० पासून सरकार केंद्रीय कर्मचाऱ्यांच्या निवृत्तीच्या वयात काही बदल करू शकतं, असं वृत्त होतं. त्यामुळं केंद्रीय कर्मचाऱ्यांमध्ये संभ्रम निर्माण झाला होता. मात्र, केंद्रीय राज्यमंत्री जितेंद्र सिंह यांनी हा संभ्रम दूर केला आहे. त्यांनी कर्मचाऱ्यांच्या निवृत्तीच्या वयाबाबत लोकसभेतच लेखी उत्तरात माहिती दिली आहे. केंद्रीय कर्मचाऱ्यांच्या निवृत्तीचं वय हे साठ वर्षे राहील हे स्पष्ट झालं आहे. कर्मचाऱ्यांच्या निवृत्तीचं वय ६० वरून ५८ वर्षे करण्याबाबत कोणताही प्रस्ताव नाही, असं सिंह यांनी सांगितलं.
'मूलभूत नियम ५६ (जे), केंद्रीय नागरी सेवा (पेन्शन) नियम, १९७२च्या नियम ४८ आणि नियम १६ (३) (संशोधित) ऑल इंडिया सर्व्हिसेस (मृत्यू/निवृत्तीपश्चात लाभ) नियम, १९५८अंतर्गत तरतुदीनुसार सरकारला वेळेआधी अधिकाऱ्यांच्या निवृत्तीचा पूर्ण अधिकार आहे. सरकार सार्वजनिक हितार्थ कर्मचाऱ्याला नोटीस पाठवण्याचा अधिकार आहे. अशा प्रकरणात सरकार तीन महिन्यांहून कमी कालावधीसाठी नोटीस देऊ शकत नाही किंवा तीन महिन्यांचं वेतन आणि भत्ते देईल,' अशी माहिती जितेंद्र सिंह यांनी लोकसभेत दिली. ग्रुप 'ए' किंवा ग्रुप 'बी', स्थायी अथवा अस्थायी स्वरूपात सेवेत असलेले आणि वय वर्षे ३५च्या आधी रूजू झालेले आणि ५० हून अधिक वय असलेल्या कर्मचाऱ्यांना या तरतुदी लागू होऊ शकतात. तर अन्य प्रकरणांत वय वर्षे ५५ पेक्षा अधिक असलेल्या कर्मचाऱ्यांना हे नियम लागू असतील, असंही त्यांनी स्पष्ट केलं.
तत्पूर्वी, केंद्रीय कर्मचाऱ्यांच्या निवृत्तीच्या वयासंदर्भात सरकारनं निर्णय घेतल्याचं आणि १ एप्रिल २०२० पासून निवृत्तीच्या वयात बदल होण्याची शक्यता असल्याचं वृत्त होतं. सध्या केंद्रीय कर्मचाऱ्याच्या निवृत्तीचं वय ६० वर्षे आहे, तर डॉक्टर आणि विद्यापीठातील प्राध्यापकांच्या निवृत्तीचं वय ६५ वर्षे आहे. निवृत्तीच्या वयात बदल केल्यास केंद्रीय कर्मचाऱ्यांच्या बढतीचा आणि नव्याने होणाऱ्या भरतीचा मार्ग मोकळा होईल, असंही या वृत्तात म्हटलं होतं.



  Print






News - World | Posted : 2019-11-27






Related Photos