सत्तास्थापनेची दिल्लीत खलबतं, संजय राऊत पुन्हा शरद पवारांच्या भेटीला


विदर्भ न्यूज एक्सप्रेस 
वृत्तसंस्था / नवी दिल्ली :
शिवसेना नेते संजय राऊत यांनी आज पुन्हा राष्ट्रवादीचे अध्यक्ष शरद पवार यांची त्यांच्या दिल्लीतील निवासस्थानी भेट घेतली. अवघ्या दहा मिनिटाच्या या भेटीत महत्त्वाच्या विषयावर खलबतं झाल्याचं सांगण्यात येतं. पवार यांनी शिवसेनेसोबत जाण्याबाबत कोणताही निर्णय घेण्यात आला नसल्याचं वक्तव्य केल्यानंतर आज सलग दुसऱ्या दिवशी राऊत यांनी पवारांची भेट घेतल्याने या भेटीबाबतचे तर्क-वितर्क वर्तवण्यात येत आहेत.
राष्ट्रवादीचे अध्यक्ष शरद पवार यांनी काल काँग्रेसच्या हंगामी अध्यक्षा सोनिया गांधी यांची भेट घेतली होती. त्यानंतर झालेल्या पत्रकार परिषदेत पवार यांनी या बैठकीत महाराष्ट्रातील राजकीय परिस्थितीवर चर्चा करण्यात आली. मात्र शिवसेनेबरोबर जाण्याबाबत कोणतीही चर्चा करण्यात आली नसल्याचं स्पष्ट केलं. त्यानंतर लगेचच शिवसेना नेते संजय राऊत यांनी पवार यांच्या निवासस्थानी जाऊन त्यांची भेट घेऊन चर्चा केली होती. या भेटीनंतर राऊत यांनी सावध पवित्रा घेत कोणतीही थेट उत्तरं दिली नव्हती. त्यामुळे पवार-राऊत भेटीत नेमकं काय घडलं ? यावर राजकीय वर्तुळात तर्क-वितर्क लढवले जात होते. ही चर्चा सुरू असतानाच राऊत यांनी आज पुन्हा एकदा पवारांची त्यांच्या निवासस्थानी जाऊन भेट घेतल्याने पुन्हा एकदा राजकीय तर्क-वितर्कांना उधाण आले आहे. राऊत यांनी पवार यांची अवघे दहा मिनिटेच भेट घेतली. अवघ्या दहा मिनिटाच्या या भेटीत नेमकी कशावर चर्चा झाली? याबाबत कोणताही तपशील मिळू शकला नाही. मात्र काल पवार यांनी सोनिया गांधींची भेट घेतली होती. त्यात काँग्रेसकडून काही मुद्दे उपस्थित करण्यात आले होते. त्याबाबतची शिवसेना पक्षप्रमुख उद्धव ठाकरे यांची भूमिका स्पष्ट करण्यासाठीच राऊत यांनी आज पवारांची भेट घेतल्याचं सांगण्यात येतं.



  Print






News - World | Posted : 2019-11-19






Related Photos