ईव्हीएमवर शंका उपस्थित करणारे निकालानंतर शांत


विदर्भ न्यूज एक्सप्रेस 
प्रतिनिधी / गडचिरोली : 
मागील लोकसभा निवडणुकीनंतर आणि महाराष्ट्र आणि हरयाणा निवडणुकांआधी ईव्हीएमवर शंका उपस्थित करणाऱ्या विरोधकांनी निवडणूक निकालानंतर मात्र, ईव्हीएमवर शंका उपस्थित न केल्याने  आश्चर्य व्यक्त केल्या जात आहे. यावेळी निवडणूक निकालांनी जवळजवळ सर्वच एक्झिट पोल फोल ठरवले असून, महाराष्ट्रात विरोधी पक्ष असलेल्या काँग्रेस आणि राष्ट्रवादीनं शंभरच्या आसपास जागांवर विजय मिळवला आहे. तर हरयाणातही काँग्रेसची कामगिरी दमदार झाली आहे.
गेल्या काही वर्षांपासून प्रत्येक निवडणुकीनंतर ईव्हीएममध्ये घोटाळा होत असल्याचा आरोप विरोधकांकडून केला जात आहे. विरोधी पक्षांच्या प्रमुख नेत्यांनी यासंबंधी अनेकदा आरोप केले आहेत. मात्र, महाराष्ट्र आणि हरयाणातील विधानसभा निवडणूक निकालानंतर ईव्हीएमवर कोणत्याही पक्षानं शंका उपस्थित केली नाही. या दोन्ही निवडणूक निकालानंतर पहिल्यांदाच असं घडल्याचं बोललं जात आहे.
गेल्या काही वर्षांपासून निवडणुकांचे निकाल जाहीर झाल्यानंतर विरोधकांकडून ईव्हीएमचा मुद्दा उपस्थित केला जात असे. महाराष्ट्र आणि हरयाणात झालेल्या निवडणुकांआधीही विरोधी पक्षांच्या नेत्यांनी ईव्हीएमचा मुद्दा उपस्थित केला होता. मात्र, निवडणूक निकालानंतर हा मुद्दा अद्याप कुणीही उपस्थित केला नाही, किंवा तसं विधानही कुणी केल्याचं समोर आलं नाही. ईव्हीएमसंबंधी एका जाणकाराच्या म्हणण्यानुसार, 'निवडणूक निकालांआधी ईव्हीएमशी छेडछाड झाल्याचा दावा करणारे कर्नाटक, मध्यप्रदेश आणि राजस्थानमधील निकालानंतरही चिडीचूप होते. ईव्हीएम हॅक होऊ शकतं हा दावा पूर्णपणे चुकीचा असल्याचं यावेळच्या हरयाणा आणि महाराष्ट्रातील विधानसभा निवडणूक निकालांनी सिद्ध करून दाखवलं आहे. '
निवडणूक आयोगाच्या डेटानुसार, हरयाणा आणि कर्नाटक विधानसभा निवडणुकीत ईव्हीएम बॅलेट युनिट, कंट्रोल युनिट्स आणि व्हीव्हीपॅटचा ( अनुक्रमे ०.४२ टक्के, ०.४४ टक्के आणि २.६९ टक्के) वापर झाला होता. ही यंत्रणा पूर्णपणे दोषमुक्त असल्याचं चाचण्यांमध्ये आढळून आलं होतं. मात्र, यावेळीही निवडणुकांदरम्यान ईव्हीएमचा मुद्दा उपस्थित झाला होता. हरयाणातील असांध विधानसभा मतदारसंघातील उमेदवार बख्शीश सिंह विर्क यांचा एक व्हिडिओ प्रचंड व्हायरल झाला होता. ईव्हीएमवरील कोणतंही बटण दाबलं तरी मत भाजपलाच मिळेल, असं म्हणताना विर्क या व्हिडिओत दिसले. मात्र, त्यानंतर हा व्हिडिओ बोगस असल्याचं त्यांनी स्पष्ट केलं. विर्क हे निवडूनही येऊ शकले नाहीत. तर सातारामधील नवलेवाडीत ईव्हीएमवरील कोणतंही बटण दाबलं तरी कमळ या चिन्हालाच मत जात असल्याचं मतदारांनी अधिकाऱ्यांच्या निदर्शनास आणून दिलं होतं. तिथे तर अधिकाऱ्यांनीही हे मान्य केलं आणि ईव्हीएम बदललं होतं. 



  Print






News - Rajy | Posted : 2019-10-25






Related Photos