महत्वाच्या बातम्या

पथनाट्यच्या माध्यमातुन मतदार जनजागृती

विदर्भ न्यूज एक्सप्रेस

प्रतिनिधी / वर्धा : वर्धा लोकसभा मतदार संघातील वर्धा विधानसभा मतदार संघात उपविभागीय अधिकारी तथा सहाय्यक निवडणूक निर्णय अधिकारी दीपक कारंडे यांच्या मार्गदर्शनात लोकसभा निवडणूकीत मतदानाची टक्केवारी कमी झालेल्या मतदान केंद्र परिसरात व शहरातील मध्यवर्ती व गर्दीच्या ठिकाणी पथनाट्यच्या माध्यमातुन मतदार जनजागृती करण्यात येत आहे.

तहसिलदार संदीप पुंडेकर, स्वीप नोडल अधिकारी बाळुताई भागवत, सहाय्यक नोडल अधिकारी प्रा. गिरीष काळे, प्रा.डॉ. अरविंद पाटील यांच्या मार्गदर्शना शहरातील विविध भागात विशेष मतदार जनजागृती करण्यात येत आहे.

मतदार जनजागृती कार्यक्रमाचे नियोजन प्रा. गिरीष काळे यांनी केले असून त्यांनी लिहिलेले दिव्यांग मतदार जनजागृती गीत अभिनयासह सादरीकरण करण्यात आले. तसेच चला मतदान करुया नाटिकेचे सुध्दा जनजागृती कार्यक्रमात सादरीकरण करण्यात आले. यावेळी सर्वकलाकारांनी मतदान जनजागृतीपर जागर गीत सादर केले. कार्यक्रमाच्या शेवटी उपस्थित सर्व मतदारांना मतदान करण्याची प्रतिज्ञा देण्यात आली.

आर्वी नाका परिसरात मतदार जनजागृती कार्यक्रमाचे सादरीकरण होत असतांना केंद्रीय जिल्हा निरिक्षक तसेच उपविभागीय अधिकारी तथा सहाय्यक निवडणूक निर्णय अधिकारी, वर्धा व सेलू येथील तहसिलदार यांनी भेट देऊन कार्यक्रमाची पाहणी केली. यावेळी केंद्रीय निवडणूक निरिक्षकांनी मतदार जनजागृती कार्यक्रमाचे नियोजन पाहून समाधान व्यक्त केले.

मतदान जनजागृती विशेष कार्यक्रमात यशवंत महाविद्यालय, अनिकेत समाजकार्य महाविद्यालयातील विद्यार्थ्यांनी सहभाग नोंदविला. या मतदान जनजागृती कार्यक्रमातून मतदानाची टक्केवारी निश्चितच वाढेल असा आशावाद उपविभागीय अधिकारी दिपक कारंडे यांनी व्यक्त केला. कार्यक्रमास उपविभागीय कार्यालयातील व तहसिल कार्यालयातील कर्मचा-यांचे विशेष सहकार्य लाभले.