क्रीडा संकुल परिसरातील पथ दिवे कायमची राहतात बंद
- फक्त कार्यक्रमासाठी आहे का पथ दिवे, नागरिकांचा संतप्त सवाल
- पादचारी नागरिकांना होत आहे त्रास
विदर्भ न्यूज एक्सप्रेस
तालुका प्रतिनिधी / बल्लारपूर : तालुक्यातील विसापूर गावाच्या हद्दीत येणारे जुने पॉवर हाऊस परिसरातील तालुका क्रीडा संकुल पासून ते मेन रोड पर्यंतचे पथ दिवे अनेक दिवसापासून बंद अवस्थेत आहे. यामुळे विसापूर येथील सायंकाळी कामावरून परत येणाऱ्या पादचारी व सायकलस्वार नागरिकांना याचा नाहक त्रास सहन करावा लागत आहे. याकडे संबधित विभागाचे दुर्लक्ष होत असल्याने, पथ दिवे फक्त कार्यक्रमासाठीच आहे का ? असा संतप्त सवाल नागरिक करीत आहे. यावर वेळीच लक्ष देवून निराकरण करावे अशी मागणी होत आहे.
विसापूर ग्रामपंचायतीने जुन्या पॉवर हाऊस परिसरातील तालुका क्रीडा संकुल पासून बल्लारपूर - चंद्रपूर मेन रोडला जोडणाऱ्या रस्त्यावरील पथदिवे राष्ट्रीय शालेय मैदानी क्रीडा स्पर्धेच्या वेळी युद्ध स्तरावर लाखो रुपये खर्चून उभारण्यात आले होते व त्याचा त्यावेळीच्या स्पर्धेच्या वेळीत उत्तम उपयोग करण्यात आला व काही दिवस ते सुरू पण होते आणि नंतर अचानक बंद करण्यात आले. आता ते श्रद्धेय श्री अटल बिहारी वाजपेयी बॉटनिकल गार्डन व एसएनडीटी विद्यापीठ उद्घाटन समारंभाच्या दिवशी सुरू करण्यात आले आणि नंतर तेंव्हापासून बंदच आहे. यामुळे फक्त परिसरात होणाऱ्या कार्यक्रमाच्या वेळीच याचा वापर होतो व नंतर ते कायम स्वरुपी बंद असते असा समज नागरिकांचा झाला आहे.
पथदिवे कायम स्वरुपी बंद राहत असल्यामुळे विसापूर गावातील दररोज कामावर जाणाऱ्या पादचारी, सायकलस्वार नागरिकांना सायंकाळी परत येत असताना नाहक त्रास सहन करावा लागत आहे. करीता परिसरातील पथदिवे लवकरात लवकर सुरू करण्यात यावे अशी मागणी नागरिकांकडून होत आहे.
परिसरात वन्यप्राणी व लुटमारीचा वाढला धोका :
सदर परिसरात वन्यप्राणी आणि काळोख असल्याने लुटमार करणाऱ्या भामटयांचा धोका वाढला आहे. शिवाय मद्यप्राशन करणाऱ्यांचा मद्यपिंचा येथे मोठ्या प्रमाणात वावर असतो. या बाबत या पूर्वी लोकमतने बातमी प्रकाशित करून लक्ष वेधले होते. तेंव्हा तात्पुरत्या स्वरूपात बल्लारपूर पोलीसानी गस्त वाढवलियाने आळा बसला परंतु आता तिथे जैसे ती परिस्थिती आहे.
News - Chandrapur