महत्वाच्या बातम्या

पाच नद्यांच्या जलपूजनाने जलजागृती सप्ताहाचा शुभारंभ

विदर्भ न्यूज एक्सप्रेस

प्रतिनिधी / वर्धा : दरवर्षी १६ ते २२ मार्च या कालावधीत जलजागृती सप्ताहाचे आयोजन करण्यात येते. निम्न वर्धा प्रकल्प कार्यालयात नुकताच निसर्ग सेवा समितीचे संचालक मुरलीधर बेलखोडे यांच्या हस्ते वर्धा, वणा, धाम, यशोदा व बोर या पाच नद्यांचे कलशामध्ये पाणी एकत्र करुन जलपुजनाने जलजागृती सप्ताहाचा शुभारंभ करण्यात आला.

यावेळी कार्यक्रमाला निम्न वर्धा प्रकल्प विभागाचे कार्यकारी अभियंता राजेश शर्मा, निम्न वर्धा कालवे विभागाचे कार्यकारी अभियंता र.र. हरिणखेडे, लघु पाटबंधारे विभागाचे कार्यकारी अभियंता अ.ओ. सावरकर, वर्धा पाटबंधारे विभागाचे कार्यकारी अभियता नि.न. गुप्ता, उप कार्यकारी अभियंता भालेराव, सेवा निवृत्त कार्यकारी अभियंता मंडावार आदी मंचावर उपस्थित होते.

यावेळी मुरलीधर बेलखोडे यांनी पाणी वाचवा पर्यायी जीवन वाचवा अशाप्रकारे मानवी जिवनातील पाण्याच्या महत्वाबाबत मार्गदर्शन केले. तर राजेश शर्मा यांनी पाणी वापर संस्था संदर्भात विभागाची भुमिका यावर मार्गदर्शन केले.

तत्पुर्वी जलजागृती पर जनजागृती व पाण्याचे महत्व मनामध्ये रुजविण्यासाठी जलप्रतिज्ञा घेण्यात आली. कार्यक्रमाचे प्रास्ताविक पूजा अंभोरे यांनी केले तर संचालन संपना ठमके व उपस्थितांचे आभार क्रांती चव्हाण यांनी मानले. कार्यक्रमाला कार्यालयातील अधिकारी व कर्मचारी मोठ्या संख्येने उपस्थित होते.