पोटच्या दोन मुलांचा गळा दाबून बापाने केला खून


विदर्भ न्यूज एक्सप्रेस 
वृत्तसंस्था / भोर :
   आपल्या मृत्यूनंतर पत्नी मुलांचा सांभाळ करणार नाही या भीतीने पोटच्या दोन मुलांचा गळा दाबून खून करणाऱ्या आणि त्यानंतर मुलांचे मृतदेह गाडीच्या डिकीत ठेवून पत्नीला दाखविण्यासाठी घेऊन जाणाऱ्या पित्याला पुणे-सातारा महामार्गावरील खेडशिवापूर टोलनाक्यावर पोलिसांनी अटक केली. बुधवारी पहाटे हा धक्कादायक प्रकार घडला.
गौरवी चंद्रकांत मोहिते (वय ११) आणि प्रतीक चंद्रकांत मोहिते (वय ७) अशी खून झालेल्या मुलांची नावे असून, मुलांच्या खूनप्रकरणी चंद्रकांत अशोक मोहिते (वय ३८ रा. साईबाबा मंदिर, घाटकोपर पूर्व, मुंबई) याला अटक करण्यात आली आहे.
शिरवळ पोलिसांनी दिलेल्या माहितीनुसार, चंद्रकांत दोन वर्षांपासून क्षयरोगाने आजारी आहे. त्याची पत्नीशी सतत भांडणे होत होती. त्यातच आपल्यानंतर मुलांना कोणीही सांभाळणार नाही, या विचारातून त्याने मुलांना मारण्याचा निर्णय घेतला. त्यानंतर आत्महत्या करण्याचेही त्याने ठरवले होते. चंद्रकांतच्या भावाचा टुरिस्टचा व्यवसाय असून, तो त्याच्याकडे चालक म्हणून काम करायचा. भावाच्या चारचाकीतून दोन्ही मुलांना देवीच्या दर्शनाला घेऊन जातो असे बायकोला सांगून, चंद्रकांत मंगळवारी रात्री मुंबईतून बाहेर पडला. त्याचे मूळ गांव सातारा जिल्ह्यात असल्याने तो तिकडेच निघाला होता.
पुण्याच्या जवळ आल्यावर त्याने आपण मुलांचा खून करणार असल्याचे भावाला फोनवरून कळविले. त्यानंतर भावाने मुंबई पोलिसांना गाडीच्या नंबरसह सर्व माहिती दिली. मुंबई पोलिसांनी पुणे ग्रामीणला हा प्रकार कळवला. त्यानंतर राजगडचे सहायक निरीक्षक दत्तात्रेय दराडे आणि त्यांच्या पथकाने पुणे-सातारा महामार्गावर गाडीच्या तपासाला सुरुवात केली. त्या वेळी चंद्रकांत खेड-शिवापूरच्या पुढे शिरवळ हद्दीत पोहोचल्याचे समजले. चंद्रकांतचा मुलगा झोपला होता आणि मुलगी जागी होती. ती झोपल्याचे समजून चंद्रकांतने शिंदेवाडी येथे गाडी रस्त्याच्या कडेला थांबवली. आवाजाने मुलगी जागी झाली आणि तिने गाडी थांबवण्याचे कारण विचारताच चंद्रकांतने तिला गळा दाबून मारले. त्यानंतर झोपलेल्या मुलाचा गळा दाबून खून केला. दोघांचे मृतदेह डिकीमध्ये टाकले आणि बायकोला दाखवण्यासाठी तो तिथूनच घाटकोपरच्या दिशेने परत निघाला. तोपर्यंत जीपीएस लोकेशननुसार पोलिसांना गाडीची माहिती मिळाली. पोलिसांनी खेडशिवापूर टोल नाक्यावर गाडी अडवली. गाडीची तपासणी केल्यानंतर डिकीमध्ये दोन्ही मुलांचे मृतदेह आढळून आले.



  Print






News - Rajy | Posted : 2019-10-10






Related Photos