चातगाव दलम कमांडरसह संपूर्ण दलमधील नक्षल्यांचे गडचिरोली पोलिसांसमोर आत्मसमर्पण ; गडचिरोली पोलिस दलाचे ऐतिहासिक यश


- विधानसभा निवडणुकीच्या पार्श्वभूमीवर गडचिरोली पोलिस दलाचे मोठे यश
- ३३ लाख ५० हजार रुपयांचे होते बक्षीस
विदर्भ न्यूज एक्सप्रेस 
प्रतिनिधी / गडचिरोली : 
महाराष्ट्र शासनाने जाहीर केलेली आत्मसमर्पण योजना, वर्षभरात विविध चकमकीत माओवाद्यांचा झालेला खात्मा तसेच हिंसाचाराच्या जिवनाला कंटाळून वरिष्ठ माओवाद्यांसह अनेक जहाल माओवाद्यांनी आतापर्यंत आत्मसमर्पण केलेले आहे. त्याचबरोबर आत्मसमर्पित माओवाद्यांचे पोलिस दलाने पुनर्वसन घडवून आणल्यामुळे माओवादी मोठ्या संख्येने आत्मसमर्पण करीत आहेत. नुकतेच ३३ लाख ५० हजार रूपयांचे बक्षीस असलेल्या चातगाव दलममधील ७ जहाल नक्षल्यांनी गडचिरोली पोलिस दलासमोर आत्मसमर्पण केले असल्याची माहिती पोलिस अधीक्षक शैलेश बलकवडे यांनी आज ९ ऑक्टोबर रोजी पोलिस अधीक्षक कार्यालयात आयोजित पत्रकार परिषदेत दिली.
पत्रकार परिषदेला अतिरिक्त पोलिस अधीक्षक मोहीत गर्ग, अतिरिक्त पोलिस अधीक्षक अजयकुमार बन्सल उपस्थित होते.
राकेश उर्फ गणेश सनकू आचला (३४) हा जून २००६ मध्ये टिपागड दलममध्ये सदस्य म्हणून भरती होऊन  
जानेवारी २०१२ पासून ते आजपर्यंत माओवाद्यांच्या चातगाव दलमच्या कमांडर पदावर कार्यरत होता. त्याच्यावर २० चकमक, ७ खून व २ जाळपोळीचे गुन्हे दाखल असून शासनाने त्याच्यावर ५ लाख ५० हजार रूपयांचे बक्षीस जाहीर केले होते. 
देविदास उर्फ मनिराम सोनू आचला (२५) हा जानेवारी २०११ मध्ये चातगाव दलममध्ये सदस्य म्हणून भरती होऊन  २०१४ पासून आजपर्यंत चातगाव दलमच्या उपकमांडरपदी कार्यरत होता. त्याच्यावर चकमकीचे व ९ खूनाचे गुन्हे दाखल आहेत. महाराष्ट्र शासनाने त्याच्यावर ५ लाख रूपयांचे बक्षीस जाहीर केले होते.
रेश्मा उर्फ जाई दुलसू कोवाची (१९) ही २०१७ मध्ये चातगाव दलमच्या सदस्य पदावर भरती होऊन  आजपर्यंत चातगाव दलममध्ये कार्यरत होती. तिच्यावर २ चकमक व खूनाचा एक गुन्हा दाखल आहे. शासनाने तिच्यावर ४ लाख ५० हजार रूपयांचे बक्षीस जाहीर केले होते. 
अखिला उर्फ राधे झुरे (२७) ही २०१२ ला कसनसूर दलममध्ये कसनसूर दलममध्ये भरती होऊन २०१९ पासून चातगाव दलममध्ये सदस्य पदावर कार्यरत होती. तिच्यावर ९ चकमक, ३ खूनाचे व ३ जाळपोळीचे गुन्हे दाखल आहेत. शासनाने तिच्यावर ४ लाख ५० हजार रूपयांचे बक्षीस जाहीर केले होते.
शिवा विज्या पोटावी (२२) हा २०१४ मध्ये कसनसूर दलममध्ये भरती होऊन  सप्टेंबर २०१८ पासून चातगाव दलममध्ये कार्यरत होता. त्याच्यावर ३ चकमकीचे गुन्हे दाखल आहेत. शासनाने त्याच्यावर ४ लाख ५० हजार रूपयांचे बक्षीस जाहीर केले होते.
करूणा उर्फ कुम्मे रामसिंग मडावी (२२) ही नोव्हेंबर २०१६ पासून टिपागड दलममध्ये कार्यरत होती. तिच्यावर २ चकमक, १ खून व ३ जाळपोळीचे गुन्हे दाखल आहेत. शासनाने तिच्यावर ४ लाख ५० हजार रूपयांचे बक्षीस जाहीर केले होते.
राहूल उर्फ दामजी सोमजी पल्लो (२५) हा नोव्हेंबर २०१३ पासून कसनसूर दलममध्ये सदस्य म्हणून भरती झाला. जानेवारी २०१४ पासून प्लाटून नंबर ३ मध्ये सदस्य पदावर कार्यरत होता. त्याच्यावर १० चकमक, ४ खून व २ जाळपोळीचे गुन्हे दाखल आहेत. शासनाने त्याच्यावर ५ लाख रूपयांचे बक्षीस जाहीर केले होते.
आत्मसमर्पित माओवादी दलममध्ये काम करताना महिलांवर होत असलेले अत्याचार तसेच दलममधील माओवादी हे अल्पवयीन आदिवासी मुलींना पळवून नेवून बळजबरीने त्यांना दलममध्ये भरती करीत होते, असे कबुल करीत आदिवासींवर होणारे अनन्वीत अत्याचार व माओवादी नेहमीच स्वत:च्या फायद्यासाठी जाणूनबुजून दुर्गम व अतिदुर्गम भागाच्या विकास कामात आडकाठी निर्माण करतात. या सर्व बाबींना कंटाळून नक्षल्यांच्या तावडीतून स्वत:ची सुटका करून घेत आपल्याला विकासाच्या मूख्य प्रवाहात परत जावून सामान्य व्यक्तीसारखे जीवन जगता येईल की नाही? याबाबत आमच्या मनामध्ये शाशंकता होती, असे सांगितले. परंतु पोलिस दलाने निर्माण केलेल्या विश्वासामुळे व महाराष्ट्र  शासनाच्या आत्मसमर्पित योजनेमुळे आम्ही आज पोलिसांपुढे आत्मसमर्पण करीत असल्याचे या आत्मसमर्पितांनी सांगितले.
यावेळी त्यांनी दलममधील इतर माओवादी देखील हिंसाचाराचा मार्ग सोडून आपणच आपल्या आदिवासी बांधवांवर करीत असलेले अनन्वीत अत्याचार थांबवून आपल्या भागाचा देखील इतर उन्नत समाजाप्रमाणे विकास व्हावा, या दृष्टीने विकासाच्या मूळ प्रवाहात येण्यासाठी आत्मसमर्पण योजनेचा फायदा घेत विकासाच्या मूळ प्रवाहात यावे याबद्दल आवाहन केले.
गडचिरोली पोलिस दलाने अतिशय प्रभावीपणे नक्षलविरोधी अभियान राबविल्यामुळे २०१९ मध्ये आजपर्यंत पोलिस अधीक्षक शैलेश बलकवडे यांच्यासमोर एकूण २३ माओवाद्यांनी आत्मसमर्पण केले. यात ३ डिव्हीसी, १ दलम कमांडर, १ दलम उपकमांडर, १७ सदस्य, १ जनमिलीशिया यांचा समावेश आहे. तर २१ माओवाद्यांना अटक करण्यात पोलिसांना यश आले आहे. यामध्ये डी.के.एस.झेड.सी. मेंबर २, दलम कमांडर १, सदस्य ३, पार्टी मेंबर २, समर्थक १३ यांचा समावेश आहे.
विकास कामांना राखणाऱ्या  माओवाद्यांवर पोलिस दल सक्षमपणे कारवाई करण्यास तत्पर असून जे माओवादी विकासाच्या प्रवाहात सामील होण्यास इच्छूक असतील त्यांना विकासाच्या मुख्य प्रवाहात आणण्यासाठी तसेच लोकशाहीत सन्मानाने जीवन जगण्यासाठी गडचिरोली पोलिस दल सर्वतोपरी मदत करेल, असे आवाहन पोलिस अधीक्षक शैलेश बलकवडे यांनी केले आहे.

 



  Print






News - Gadchiroli | Posted : 2019-10-09






Related Photos