आरमोरी विधानसभा क्षेत्रातून ५ तर गडचिरोली, अहेरीतून प्रत्येकी एका उमेदवाराची माघार


विदर्भ न्यूज एक्सप्रेस
प्रतिनिधी / गडचिरोली :
विधानसभा निवडणूकीसाठी नामनिर्देशन केलेल्या उमेदवारांसाठी आज ७ ऑक्टोबर ही अर्ज मागे घेण्याची शेवटची तारीख होती. जिल्ह्यातील तिनही विधानसभा क्षेत्रातून केवळ ७  उमेदवारांनी नामनिर्देशन मागे घेतले असून यामध्ये आरमोरी विधानसभा क्षेत्रातील ५ तर गडचिरोली आणि अहेरी विधानसभा क्षेत्रातील प्रत्येकी एका उमेदवाराचा समावेश आहे.
आरमोरी विधानसभा क्षेत्रातून अपक्ष शरद सोनकुसरे, निताराम कुमरे, अनिल कुमरे, वामन सावसाकडे आणि रमेश गोविंदा मानागडे यांनी अर्ज मागे घेतले आहेत. गडचिरोली विधानसभा क्षेत्रातून अपक्ष मन्साराम माधव आत्राम यांनी उमेदवारी मागे घेतली आहे. तर अहेरी विधानसभा क्षेत्रातून अपक्ष संदीप मारोती कोरेत यांनी आपला अर्ज मागे घेतला आहे.

लढतीचे चित्र स्पष्ट, चिन्हे मिळाली 

आज अर्ज मागे घेण्याच्या शेवटच्या दिवशी तिनही विधानसभा क्षेत्रातून ७ उमेदवारांनी अर्ज मागे घेतले आहेत. आता निवडणूकीच्या रिंगणात उतरलेल्या उमेदवारांपैकी लढतीचे चित्र रंगविण्यास सुरूवात झाली आहे. 
आरमोरी विधानसभा क्षेत्रातून भाजपाचे कृष्णा गजबे, काॅंग्रेसचे आनंदराव गेडाम, वंचित बहुजन आघाडीचे रमेश कोरचा, कम्युनिस्ट पार्टी आफ इंडीयाचे दिलीप परचाके, बसपाचे बाळकृष्ण सडमाके, अपक्ष कवळु सहारे, विदर्भ राज्य आघाडीचे मुकेश नरोटे, अपक्ष मनेश्वर मडावी, सुरेंद्रसिंह चंदेल, बगुजी ताडाम, निलेश कोडापे हे निवडणूकीच्या रिंगणात आहेत.
गडचिरोली विधानसभा क्षेत्रातून भाजपाकडून उमेदवारी न मिळालेले मन्साराम माधव आत्राम यांनी उमेदवारी मागे घेतली आहे. यामुळे आता भाजपाकडून डाॅ. देवराव होळी, काॅंग्रेसच्या डाॅ. चंदा कोडवते, अपक्ष संतोष मडावी, अपक्ष शिवाजी नरोटे, संतोष सोयाम, शेतकरी कामगार पक्षाच्या जयश्री वेळदा, अपक्ष केशरी कुमरे, गुलाबराव मडावी, बहुजन समाज पार्टीचे अक्षमलाल सिडाम, गोंडवाना गणतंत्र पार्टीच्या ममीता हिचामी, आंबेडकराईट पार्टी ऑफ इंडीयाचे सतिश कुसराम, अपक्ष सागर कुंभरे, वंचित बहूजन आघाडीचे गोपाल मगरे, अपक्ष चांगदास मसराम आणि संभाजी ब्रिगेडचे दिलीप मडावी हे निवडणूकीच्या रिंगणात आहेत.
अहेरी विधानसभा क्षेत्रातून अपक्ष संदीप कोरेत यांनी उमेदवारी मागे घेतली आहे. आता काॅंगेसचे दीपक आत्राम, राकाॅंचे धर्मरावबाबा आत्राम, भारतीय जनता पक्षाचे राजे अम्ब्रीशराव आत्राम, वंचित बहूजन आघाडीचे लालसु नागोटी, बहुजन समाज पार्टीचे मधुकर सडमेक, शेकापचे नागेश तोर्रेम, अपक्ष अजय आत्राम, कैलास कोरेत दिनेश मडावी हे निवडणूकीच्या रिंगणात आहेत.
आजच उमेदवारांना चिन्ह वाटप करण्यात आले असून सर्वच विधानसभा क्षेत्रात प्रमुख पक्षांच्या उमेदवारांमध्ये लढत होणार आहे. अपक्षांमुळे या उमेदवारांना काही ठिकाणी फटका बसू शकतो. अहेरीत राकाॅं आणि काॅंगे्रसचे दोन्ही उमेदवार निवडणूकीच्या रिंगणात कायम आहे. यामुळे दोन्ही उमेदवारांना फटका बसू शकतो. तर गडचिरोली विधानसभा क्षेत्रात शेकाप आघाडीमध्ये असतानाही निवडणूक लढवित  आहे. 



  Print






News - Gadchiroli | Posted : 2019-10-07






Related Photos