महत्वाच्या बातम्या

त्या जमिनीचे संपादन व मोबदला वाटप नियमानुसारच

- बरांज (मो) येथील दिव्यांग प्रकल्पग्रस्त जमीनप्रकरणी उपविभागीय अधिका-यांचे स्पष्टीकरण

विदर्भ न्यूज एक्सप्रेस

प्रतिनिधी / चंद्रपूर : भद्रावती तालुक्यातील बरांज (मोकासा) येथील दिव्यांग प्रकल्पग्रस्त देवानंद पुनवटकर यांचे जमीन संपादन व मोबदला वाटप नियमानुसारच केल्याचा खुलासा वरोराचे उपविभागीय अधिकारी यांनी केला आहे.

बरांज मोकासा येथील भीमराव उद्धव पुनवटकर, संतोष उद्धव पुनवटकर, देवानंद उद्धव पुनवटकर आणि माजरी कॉलरी येथील सुलोचना वि. उद्धव पुनवटकर यांच्या मालकीची सर्व्हे नं. २८१ आराजी १.०८ शेतजमीन प्रकरण क्र. ८/६५/२००५-०६, निवाडा २३ ऑक्टोबर २००९ रोजी व्हाईस प्रेसिडेंट, कर्नाटक एम्टा कोलमाईंन्स लिमिटेड बंगलोर, शाखा नागपूर यांच्याकरीता संपादीत करण्यात आली होती. सदर कंपनीकरीता वरील निवाड्याप्रमाणे ३३० शेतकऱ्यांची एकूण ३५४.४८ हे. आर. जमीन संपादीत करण्यात आली. निवाड्याप्रमाणे सर्व्हे नं. २८१ आराजी १.०८ हे. आार. करीता हेक्टरी दर १ लक्ष ८० हजार ७०० रुपये देण्यात आला. त्यानुसार जमिनीचे एकूण मुल्यांकन १ लक्ष ९५ हजार १५६ रुपये एवढे होते.

त्यावर ३० टक्के दिलासा रक्कम ५८ हजार ५४७ रुपये व १२ टक्के प्रतिवर्ष प्रमाणे अतिरिक्त घटकाची १७ जानेवारी २००७ ते २३ ऑक्टोबर २००९ पर्यंत एकूण १ हजार १० दिवसांची ६४ हजार ८०२ रुपये अशी एकूण ३ लक्ष १८ हजार ५०२ रुपयांची रक्कम भीमराव उद्धव पुनवटकर, संतोष उद्धव पुनवटकर, देवानंद उद्धव पुनवटकर आणि माजरी कॉलरी येथील सुलोचना वि. उद्धव पुनवटकर यांनी ६ जून २०१३ रोजी धनादेश क्रमांक ०२८७२६ अन्वये बँक खात्यात जमा करण्यात आली. तशी पोच मोबदला वाटप नोंदवहीमध्ये असून जमीन भुसंपादन व मोबदला वाटप नियमानुसारच केल्याचे स्पष्टीकरण वरोराचे उपविभागीय अधिकारी यांनी केला आहे.