अहेरी विधानसभा क्षेत्रातील सस्पेंस संपला, राजे अम्ब्रीशराव आत्राम यांनाच भाजपाची उमेदवारी


विदर्भ न्यूज एक्सप्रेस
प्रतिनिधी / गडचिरोली
: भाजपाची पहिली यादी काल १ ऑक्टोबर रोजी जाहिर झाली. यामध्ये गडचिरोली जिल्ह्यातील आरमोरी आणि गडचिरोली विधानसभा क्षेत्राची उमेदवारी दोन्ही विद्यमान आमदारांना जाहिर करण्यात आली. मात्र अहेरी विधानसभा क्षेत्राचा या यादीत समावेश नव्हता. यामुळे विद्यमान आमदार राजे अम्ब्रीशराव आत्राम यांचा पत्ता कट होणार काय अशी चर्चा होती. मात्र आज भाजपाने अखेर राजे अम्ब्रीशराव आत्राम यांचे नाव जाहिर केले असल्याने आता या विधानसभा क्षेत्रातील सस्पेंस संपला आहे.
अहेरी विधानसभा क्षेत्रातून विद्यमान आमदार राजे अम्ब्रीशराव आत्राम, राकाॅंचे नेते व माजी राज्यमंत्री धर्मरावबाबा आत्राम आणि आविसचे नेते माजी आमदार दीपक आत्राम हे  सुध्दा भाजपाकडून तिकीट मिळविण्याच्या प्रयत्नात होते. मागील ४ दिवसांपासून माजी राज्यमंत्री धर्मरावबाबा आत्राम यांचे नाव जोरदार चर्चेत होते. भाजपाने पहिल्या यादीत अहेरी विधानसभा क्षेत्रातून कोणत्याही उमेदवाराचे नाव जाहिर न केल्यामुळे आणखी संभ्रम वाढला होता. तसेच संपूर्ण जिल्हावासीयांचे या विधानसभा क्षेत्रातील घडामोडींकडे लक्ष लागले होते. मात्र भाजपाने अखेर राजे अम्ब्रीशराव यांना तिकीट दिल्याने आता लढतीचे चित्र स्पष्ट झाले आहे.



  Print






News - Gadchiroli | Posted : 2019-10-02






Related Photos