मतदारयादीत ४ ऑक्टोबरपर्यंत नाव नोंदविता येणार


- राज्याचे मुख्य निवडणूक अधिकारी बलदेव सिंह यांची माहिती 
वृत्तसंस्था /  मुंबई : 
 यंदाच्या विधानसभा  निवडणुकीत मतदानाचा टक्का वाढावा यासाठी निवडणूक आयोगाचे प्रयत्न आहे. त्यामुळे वयाची १८ वर्षे पूर्ण करणाऱ्या आणि अद्याप मतदार यादीत नावाची नोंदणी न केलेल्या नव्या मतदारांना विधानसभा निवडणुकीसाठी उमेदवारी अर्ज भरण्याच्या दिवसांपर्यंत म्हणजे ४ ऑक्टोबरपर्यंत आपले नाव नोंदविता येईल. यासाठी संबंधितांनी आपल्या नावाची नोंदणी मतदारयादीत करून, लोकशाहीत मतदानाचा हक्क बजवावा, असे आवाहन राज्याचे मुख्य निवडणूक अधिकारी बलदेव सिंह यांनी शनिवारी मंत्रालयात घेतलेल्या पत्रकार परिषदेत केले आहे.
राज्‍यातील मतदारनोंदणीची प्रक्रिया विधानसभा निवडणुकीचे अर्ज भरण्याच्या शेवटच्या दिवसापर्यंत म्‍हणजे ४ ऑक्‍टोबर २०१९पर्यंत सुरू राहणार आहे. यावेळी नोंदणी करणाऱ्यांना निवडणुकीत मतदान करता येईल. त्‍यामुळे ज्‍यांची नोंदणी झालेली नसेल अशा व्यक्‍तींनी आपली नोंदणी करून घ्‍यावी, असे आवाहन बलदेव सिंह यांनी केले. विधानसभा निवडणुकीसाठी मतदार नोंदणीची प्रक्रिया येत्या ४ ऑक्‍टोबरपर्यंत सुरू राहणार आहे. यादीत नाव नसलेल्या जास्‍तीत जास्‍त लोकांनी नोंदणी करावी. ३१ ऑगस्‍ट २०१९ पर्यंत महाराष्‍ट्रात ८ कोटी ९४ लाख ४६ हजार २११ मतदार आहेत. सन २०१४च्या तुलनेत मतदारांच्या एकूण संख्येमध्ये ५९ लाख १७ हजार ९०१ इतकी वाढ झाली आहे. सन २०१४ साली ९०.४३ टक्‍के मतदारांकडे व्होटर आयडी होते. हे प्रमाण सन २०१९मध्ये ९६.८१ टक्‍के इतके झाले असल्‍याचेही त्‍यांनी सांगितले.
विहित केलेल्या कार्यपध्दतीनुसार मयत, अन्यत्र स्थलांतरीत, दुबार नोंदणी झालेल्या काही मतदारांची नावे वगळण्यात आली आहेत. अंतिम मतदार यादीतील तसेच वगळण्यात आलेल्या नावांची यादी https://ceo.maharashtra.gov.in या संकेतस्थळावर उपलब्ध आहे. तसेच नवीन मतदारांना आपल्या नावाची नोंदणी संबंधित जिल्हाधिकारी व जिल्हा निवडणूक अधिकारी, मतदार नोंदणी अधिकारी, तहसिलदार कार्यालय येथे करता येईल. नावांबाबत समस्या असल्यास पुन्हा योग्य पुराव्यांच्या आधारे मतदारनोंदणी करून घ्यावी. ऑनलाइन मतदारनोंदणी करण्यासाठी ऑनलाइन व ऑफलाइन सुविधाही उपलब्ध आहे. त्यासाठी www.nvsp.in या संकेतस्थळाचा वापर करावा, असे आवाहन बलदेव सिंह यांनी केले आहे.
 

 



  Print






News - Rajy | Posted : 2019-09-22






Related Photos