महत्वाच्या बातम्या

बालगृहातील विद्यार्थ्यांनी बाल महोत्सवात घेतला उत्स्फूर्त सहभाग

- तीन दिवसीय चाचा नेहरू बाल महोत्सवाचे उद्घाटन

- जिल्हा महिला व बालविकास विभागाकडून आयोजन

विदर्भ न्यूज एक्सप्रेस

प्रतिनिधी / नागपूर : महिला व बालविकास विभागाअंतर्गत कार्यरत असलेल्या शासकीय, स्वयंसेवी संस्थांमधील अनाथ, निराधार, उन्मार्गी मुलांनी बाल महोत्सवात उत्स्फूर्त सहभाग घेतला. तीन दिवसीय बाल महोत्सवाचा आज ग्रामीण पोलिस मुख्यालयाच्या सभागृहात शुभारंभ करण्यात आला. उद्घाटन कार्यक्रमासाठी प्रमुख पाहुणे म्हणून राज्य महिला आयोगाच्या सदस्या आभा पांडे तर अध्यक्षस्थानी विभागीय उपायुक्त महिला व बालविकास अपर्णा कोल्हे यांची उपस्थिती होती. बाल कल्याण समिती अध्यक्षा छाया राऊत, जिल्हा महिला व बालविकास अधिकारी अंजली निंबाळकर, जिल्हा परीविक्षा अधिकारी चंद्रकांत बोंडे, जिल्हा बालसंरक्षण अधिकारी मुश्ताक पठाण, परीविक्षा अधिकारी मोरेश्वर झोडे यांच्यासह अधिकारी व कर्मचारी यावेळी उपस्थित होते.

महिला व बालविकास विभागांतर्गत येणाऱ्या विद्यार्थ्यांमध्ये एकमेकाविषयी बंधुभाव, सांघिक भावना निमार्ण होण्यासाठी जिल्हा स्तरावर चाचा नेहरु बाल महोत्सव आयोजित करण्यात येतो. तीन दिवसीय या महोत्सवात विविध प्रकारचे खेळ, चित्रकला स्पर्धा, सांस्कृतिक स्पर्धा इत्यादी स्पर्धांचे आयोजन होणार आहे. या महोत्सवांतर्गत विविध सांस्कृतिक कार्यक्रमांचेही आयोजन करण्यात आले आहे. २३ फेब्रुवारीपर्यंत हा महोत्सव सुरू राहणार आहे.

उदघाटन कार्यक्रमाचे संचालन संरक्षण अधिकारी साधना ठोंबरे यांनी केले तर आभार बापूसाहेब चिंचाने यांनी मानले.