महत्वाच्या बातम्या

 दर्जाहीन कामे करणाऱ्या कंत्राटदारांना काळ्या यादीत टाका : बहुजन रिपब्लिकन सोशालिस्ट पक्षाची मागणी


विदर्भ न्यूज एक्सप्रेस 
प्रतिनिधी / गडचिरोली : नक्षलग्रस्त, दुर्गम भागातील रस्ते आणि पुलांची बांधकामे दर्जाहीन होत आहेत. काम झाल्याच्या चार सहा महिन्यांतच सदरचे रस्ते आणि पुलांची दुरावस्था होत असून स्वतःच्या आर्थिक स्वार्थापोटी दर्जाहीन कामे करणाऱ्या कंत्राटदारांच्या बांधकामांची चौकशी समिती मार्फत चौकशी करून दोषी कंत्राटदारांना काळ्या यादीत टाकण्यात यावे, अशी मागणी बहुजन रिपब्लिकन सोशालिस्ट पक्षाने केली आहे.

बहुजन रिपब्लिकन सोशालिस्ट पक्षाने गडचिरोलीच्या सार्वजनिक बांधकाम विभागाचे अधिक्षक अभियंता आणि प्रधानमंत्री ग्राम सडक योजनेचे कार्यकारी अभियंता यांच्याकडे केलेल्या तक्रारीत म्हटले आहे की, जिल्ह्यातील भामरागड, अहेरी, एटापल्ली, धानोरा, कोरची, कुरखेडा, मुलचेरा तालुक्यात रस्ते, पुल यासारखे विकास कामे काही कंत्राटदार अंदाजपत्रकीय रक्कमेच्या ३० ते ४० टक्के बोलीमध्ये बोली लावून करारनामा करतात. आणि परिसर दुर्गम असल्याचा फायदा घेत स्वतः चे आर्थिक स्वार्थ साधण्यासाठी संबंधित कामांमध्ये कोणत्याही प्रकारचा दर्जा न राखता कामे करतात. यामुळे काम झाल्याच्या ६ महिन्यात सदर रस्ते वाहून जाणे, उखडून जाणे भेगा पडणे असे प्रकार उघडकीस आलेले आहेत. ही जनतेची फसवणूक आणि शासनाच्या पैशांची लुट असल्याचा आरोपही या तक्रारीत बहुजन रिपब्लिकन सोशालिस्ट पक्षाने केला आहे.

त्यामुळे भामरागड, अहेरी, एटापल्ली, धानोरा, कोरची, कुरखेडा, मुलचेरा तालुक्यात रस्ते आणि पुलांची सन जानेवारी २०२० ते डिसेंबर २०२३ पर्यंत अंदाजपत्रकीय रक्कमेच्या ३० ते ४० टक्के बोलीमध्ये बोली लावून करारनामा केलेल्या आणि बांधकाम झालेल्या कामांची वरिष्ठ स्तरावरील चौकशी समिती नेमून चौकशी करावी व संबंधित कंत्राटदारांना काळ्या यादीत टाकण्यात यावे, अशी मागणी बहुजन रिपब्लिकन सोशालिस्ट पक्षाचे जिल्हा प्रभारी राज बन्सोड, जिल्हाध्यक्ष मिलिंद बांबोळे, प्रतिक डांगे, विनोद मडावी, सतिश दुर्गमवार यांनी केली आहे.





  Print






News - Gadchiroli




Related Photos