श्रीराम मंदिर प्राणप्रतिष्ठा निमित्य अहेरीत महायज्ञ व अन्नदान कार्यक्रम संपन्न
- मंत्री धर्मराव बाबा आत्राम व कन्या भाग्यश्री आत्राम यांनी केले विधिवत पूजा
विदर्भ न्यूज एक्सप्रेस
तालुका प्रतिनिधी / अहेरी : २२ जानेवारी रोजी होणाऱ्या अयोध्या येथील श्रीराम मंदिर प्राणप्रतिष्ठा ऐतिहासिक सोहळा निमित्याने अहेरी येथे अन्न व औषध प्रशासन मंत्री धर्मराव बाबा आत्राम आणि माजी जि.प. अध्यक्ष भाग्यश्री आत्राम यांच्या प्रमुख उपस्थितीत महायज्ञ व अन्नदान कार्यक्रम संपन्न झाला.
उद्या अयोध्या नगरीत रामलल्लाचा प्राणप्रतिष्ठा सोहळा पार पडणार आहे.या ऐतिहासिक सोहळ्यासाठी जय्यत तयारी सुरू असून अयोध्या नगरी सजली आहे. त्या अनुषंगाने देशभरात मोठ्या उत्साहात आणि भक्तिमय वातावरणात विविध कार्यक्रमांचे आयोजन करण्यात आले आहे. मंत्री धर्मराव बाबा आत्राम यांच्या अहेरी राजनगरीत २१ जानेवारी रोजी स्व. विश्वेश्वरराव महाराज चौकात महायज्ञ समारोह व अन्नदान कार्यक्रम संपन्न झाला. यावेळी स्वतः मंत्री धर्मराव बाबा आत्राम व कन्या भाग्यश्री आत्राम यांनी श्रीरामाचे विधीवत पूजा करून महायज्ञ कार्यक्रमात सहभाग घेतला.
तत्पूर्वी प्रभू श्रीराम, सीतामाता आणि लक्ष्मण यांची मूर्ती सजवून पूजापाठ करत अहेरी नगरीत रॅली काढण्यात आले. अहेरी नगरीला अयोध्या सारखे सजविण्यात आले असून सर्वत्र भक्तिमय वातावरण तयार झाले होते.
हवन पूजेला ५१ जोडप्यांची उपस्थिती -
महायज्ञ कार्यक्रमात हवन पूजा करण्यात आले. यात अहेरी येथील प्रतिष्टीत नागरिक व व्यापारी वर्ग यांचे तब्बल ५१ जोडपे उपस्थित होते. सर्वांनी मंत्राचा जप करून अग्नित आहुती अर्पण केली. महायज्ञ पूजेनंतर भाग्यश्री आत्राम यांच्या हस्ते महाप्रसाद वितरण करण्यात आले. यावेळी हजारो भाविक उपस्थित होते. कार्यक्रमासाठी राष्ट्रवादी काँग्रेस पार्टीच्या कार्यकर्त्यांनी अथक परिश्रम घेतला.
News - Gadchiroli