अभियंता तरुणीची अश्लील चित्रफित यू-ट्यूब व पॉर्न साइटवर, आरोपीस अटक


विदर्भ न्यूज एक्सप्रेस 
प्रतिनिधी / नागपूर : 
अभियंता तरुणीची अश्लील चित्रफित यू-ट्यूब व पॉर्न साइटवर अपलोड करून खंडणी उकळणाऱ्या अनिवासीय भारतीयाला अंबाझरी पोलिसांनी  नवी दिल्लीत अटक केली. फिरोज अब्दुल रहीम अन्सारी ऊर्फ अ‍ॅन्ड्र्यू ॲण्डरसन ऊर्फ मार्टिन डिक्रुझ (२९)  रा. जमशेदपूर  असे आरोपीचे नाव आहे. याप्रकरणात यापूर्वी डॉ. अभयकुमार ब्रिजकिशोर प्रसाद (३९)  रा. लोहियापुरा, पाटणा व नौफल पी. पी. कुजीयन पुलीकरमबिल  रा. वैलातूर, मल्लपूरम  या दोघांना अटक करण्यात आली होती. फिरोज हा कुवेतमध्ये जनरेटर दुरूस्तीचे काम करतो, अशी माहिती पोलिस उपायुक्त विनीता साहू यांनी मंगळवारी पत्रकार परिषदेत दिली. 
अभयकुमार प्रसाद  याच्याविरुद्ध त्याच्या पत्नीने हुंड्यासाठी छळ करीत असल्याची तक्रार दिली होती. याप्रकरणाचा खटला न्यायालयात सुरू आहे. लग्न झाले असतानाही अभयकुमार याने तरुणीला प्रेमाच्या जाळ्यात ओढले. ती अभयकुमारच्या प्रेमात आकंठ बुडाली. अभयकुमारला तिने तिची अश्लील चित्रफित पाठविली. याचदरम्यान तरुणीला स्वीडन येथे उच्च शिक्षणासाठी जायचे असल्याचे अभयकुमार याला माहिती होते. न्यायालयातील खटल्यामुळे त्याच्यावर कर्ज झाले होते. ते परतफेड करण्यासाठी अभयकुमार याला पैशाची गरज होती. त्याने फिरोज याच्या मदतीने तरुणी व तिच्या कुटुंबीयांकडून खंडणी उकळण्याचा कट आखला. तरुणी व तिचे कुटुंबीय २५ लाख रुपये देऊ शकतात, असेही त्याने फिरोज याला सांगून तरुणी व तिच्या कुटुंबीयाबाबत संपूर्ण माहिती दिली. 
फिरोज याने बनावट प्रोफाइल तयार करून फेसबुक, ऑर्कुट फ्रेण्ड रिक्वेस्ट पाठविली. स्वत: स्वीडनमध्ये राहात असून पॉर्न साइटवरील चित्रपटातील अभिनेता असल्याचे सांगितले. त्यानंतर तो तरुणीसोबत सतत चॅट करायला लागला. त्याने तरुणीलाही अश्लील चित्रफित पाठवायला सांगितली. तरुणीने त्याला स्वत:च्या १२ अश्लील चित्रफित पाठविल्या. त्यानंतर तो तरुणीला ब्लॅकमेल करायला लागला. त्याने तरुणीकडून पैसेही उकळले. पाठविलेल्या चित्रफित पॉर्न साइट व यू-ट्युब पोस्ट करण्याची धमकी देत फिरोज याने तरुणीला पाच लाख रुपयांची खंडणी मागितली. याचदरम्यान त्याने तरुणीच्या पाच चित्रफित यू-ट्यूब व अन्य सोशल मीडियावर अपलोडही केल्या. त्यापैकी एक चित्रफित तरुणीने अभयकुमार याला पाठविलेली होती. तरुणीने सायबर सेलकडे तक्रार केली. सायबर सेलचे तत्कालीन पोलिस निरीक्षक विजय करे यांनी तपास केला. प्रतापनगर पोलिस स्टेशनमध्ये गुन्हा दाखल करून अभयकुमारसह दोघांना अटक केली. फिरोज हा फरार होता. हायटेक तपास करून पोलिसांनी फिरोज याला नवी दिल्ली विमानतळावर अटक केली. त्याची पोलिस कोठडी घेण्यात आली आहे. 



  Print






News - Nagpur | Posted : 2019-08-14






Related Photos