महत्वाच्या बातम्या

 घरकुलासाठी अनुदान वाढविण्याची मागणी 


विदर्भ न्यूज एक्सप्रेस 
प्रतिनिधी / बल्लारपूर : तालुक्यातील ग्रामीण भागात मागील पाच वर्षांपासून घरकुलांची कामे सुरू असून, दोन हजार १७ पैकी एक हजार २२३ घरकुलांचे काम झाले आहे तर ३८६ घरकुलांचे काम प्रलंबित आहे. घरकुलासाठी मिळणारे अल्प अनुदान अपूर्ण घरकुलाला कारणीभूत असल्याचे दिसून येत आहे. आता नव्या वर्षापासून तरी घरकुलासाठी अनुदान वाढविण्यात यावे, अशी मागणी होत आहे.

पंतप्रधान आवास योजनेंतर्गत अनुसूचित जाती, जमाती व इतर पात्र लाभार्थ्यांना २०१७ ते २०२३ या कालावधीत बल्लारपूर तालुक्यातील ६३६ घरकुले मंजूर करण्यात आली. यापैकी ५११ घरकुले पूर्ण झाली तर ५५ घरकुलांचे काम प्रगतीपथावर आहे. अनुसूचित जातीसाठी रमाई घरकुल योजनेच्या पाच वर्षांतील ८६८ घरकुलांपैकी ५३१ घरकुले मंजूर झाली व ३४ घरकुलांचे काम प्रगतीपथावर आहे. तसेच शबरी घरकुल योजनेमध्ये अनुसूचित जमातीच्या लाभार्थ्यांनी ५१३ घरकुलांपैकी १८१ घरकुलांचे काम पूर्ण केले तर १७८ घरकुलांचे काम प्रगतीपथावर आहे. याशिवाय नव्याने सुरू झालेल्या यशवंतराव चव्हाण मुक्त वसाहत योजनेसाठी तालुक्यात २५७ घरकुलांचे उद्दिष्ट देण्यात आले आहे. यापैकी मानोरा, इटोली, गिलबिली, कोठारी, विसापूर व इतर गावांत घरकुलांचे संपूर्ण काम प्रगतीपथावर आहे.

तालुक्यात चार घरकुल योजनांच्या माध्यमातून २ हजार २७४ घरकुलांचे उद्दिष्ट असून, एक हजार २२३ घरकुले पूर्ण झाले आहेत. ३८६ लाभार्थ्यांनी पहिला हप्ता घेतला, परंतु घरकुलाचे काम सुरू केलेले नाही.

ग्रामीण भागात सध्या लाभार्थ्यांना १ लाख २० हजार रुपये अनुदान दिले जाते. तर शहरी भागात घरकुलासाठी अडीच लाख रुपये अनुदान दिले जाते. यामुळे मिळत असलेल्या कमी अनुदानात घर बांधायचे तरी कसे? अनुदानापेक्षा बांधकाम साहित्याचा खर्च अधिक होतो आहे. त्यामुळे गोरगरिबांच्या घराचे स्वप्न पूर्ण होणार कसे? असा प्रश्न घरकुल लाभाथ्याकडून उपस्थित होत आहे. नवीन वर्षात अनुदान वाढविण्याची मागणी होत आहे.

पाट्याविना घर : 
नवीन घराचे बांधकाम पूर्ण झाल्यावर त्या घरावर कोणत्या योजनेंतर्गत बांधकाम झाले आहे, याची पाटी लावण्यात येते, परंतु, तालुक्यातील पूर्ण झालेल्या कोणत्याही घरावर पाटी लावण्यात आलेली नाही.





  Print






News - Chandrapur




Related Photos