टाटा ट्रस्टने केला नागपूर मनपाच्या आरोग्य केंद्राचा कायापालट


विदर्भ न्यूज एक्सप्रेस 
प्रतिनिधी / नागपूर :
मनपाच्या आरोग्य केंद्राचा टाटा ट्रस्टने कायापालट केला. ट्रस्टच्या या सहकार्याबद्दल महापौर नंदा जिचकार यांच्या हस्ते अधिकाऱ्यांचा नुकताच सत्कार करण्यात आला. टाटा ट्रस्टने आरोग्य सेवा सुसज्जित करण्यासाठी दिलेल्या सहकार्याचा आम्हाला अभिमान असल्याचे गौरवोद्‌गार याप्रसंगी महापौरांनी काढले. मनपासाठी अभिमानाची बाब म्हणजे, नोव्हेंबर २०१८ या महिन्यात हा उपक्रम इतर राज्यांना प्रेरणा देण्याकरिता काझीरंगामध्ये झालेल्या ५ व्या राष्ट्रीय स्तरावरील परिषदेत सादर करण्यात आला.
मनपा मुख्यालयातील महापौर कक्षात झालेल्या छोटेखानी कार्यक्रमात टाटा ट्रस्टचे मुख्य वित्त अधिकारी आशीष देशपांडे, टाटा ट्रस्ट कृषी विभागाचे प्रमुख गणेश, राजगोपाल राव, आदर्श नागरी प्राथमिक आरोग्य केंद्र प्रकल्पाचे प्रमुख अमर नवकर, डॉ. टिकेश बिसेन यांचा पुष्पगुच्छ, शाल, श्रीफळ आणि मनपाचे गौरवचिन्ह देऊन महापौर नंदा जिचकार यांनी सत्कार केला.
महापौर नंदा जिचकार म्हणाल्या, नागरिकांना आरोग्य सुविधा देण्याचे कार्य मनपा करते आहे. मात्र या सोयी-सुविधा अधिक बळकट करण्याच्या दृष्टीने टाटा ट्रस्टने केलेले आर्थिक सहकार्य, आरोग्य अधिकारी कर्मचाऱ्यांना दिलेले प्रशिक्षण हे लाख मोलाचे आहे. यापुढेही टाटा ट्रस्टचे सहकार्य असेच राहील, असा विश्वास त्यांनी व्यक्त केला. महापौर नंदा जिचकार यांनी दाखविलेला विश्वास सार्थ ठरवू, असे टाटा ट्रस्टचे मुख्य वित्त अधिकारी आशीष देशपांडे यांनी सांगितले. नागपूर महानगरपालिकेच्या माध्यमातून नागरिकांची सेवा करण्याची संधी मिळाली, त्याबद्दल त्यांनी आभार मानले. यावेळी उपसंचालक आरोग्य विभाग डॉ. भावना सोनकुसळे, आरोग्य अधिकारी डॉ. सरिता कामदार, अतिरिक्त सहायक आरोग्य अधिकारी डॉ. विजय जोशी यांच्यासह मनपाचे पदाधिकारी, अधिकारी उपस्थित होते.



  Print






News - Nagpur | Posted : 2019-08-12






Related Photos