जम्मू-काश्मीरमध्ये कडक सुरक्षा व्यवस्था, लष्करासाठी 'हाय अलर्ट'


वृत्तसंस्था / श्रीनगर :  जम्मू-काश्मीरमधील ३७० कलम हटविण्यात आल्याच्या पार्श्वभूमीवर सोमवारी जम्मू-काश्मीरमध्ये कडक सुरक्षा व्यवस्था ठेवण्यात आली होती. काश्मीर खोऱ्यात जादा सुरक्षारक्षक तैनात करण्यात आले होते आणि बहुतांश ठिकाणी शाळा तसेच महाविद्यालये बंद ठेवण्यात आली होती. 
किश्तवर आणि राजौरी जिल्ह्यांत तसेच रामबन जिल्ह्यातील बनीहाल भागात रविवारपासूनच संचारबंदी जारी करण्यात आली होती. त्याचप्रमाणे जम्मू-काश्मीर भागांतील अनेक जिल्ह्यांमध्ये मोठ्या प्रमाणावर निर्बंध घालण्यात आले होते. कलम १४४ही अनेक ठिकाणी लावण्यात आले होते आणि त्याची काटेकोर अंमलबजावणी सुरू होती. 'सुरक्षा रक्षकांना विशेष पासचे वितरण करण्यात आले होते. अशा पासशिवाय कोणत्याही नागरिकाला रस्त्यावर येण्यावर बंधने असतील,' असे जारी करण्यात आलेल्या आदेशामध्ये नमूद करण्यात आले होते. जम्मू, किश्तवाड, रेसाई, दोडा आणि उधमपूर जिल्ह्यातील शाळा आणि महाविद्यालयांनाही सोमवारी सुटी देण्यात आली होती. काश्मीर खोऱ्यातील इंटरनेट सुविधा खंडित करण्यात आली होती. सुरक्षारक्षकांना सॅटेलाइट फोन पुरविण्यात आले होते. 
भारतीय लष्कर आणि हवाई दलासाठी हाय अलर्ट जारी करण्यात आला आहे. कायदा व सुव्यवस्था राखण्यासाठी काश्मीरमध्ये मोठ्या संख्येने जवानांना पाठवण्यात येत आहे. केंद्र सरकारने घेतलेल्या या निर्णयाच्या पार्श्वभूमीवर राज्यातील कायदा आणि सुव्यवस्था बिघडण्याची शक्यता आहे. त्यामुळे भारतीय लष्कर आणि हवाई दलासाठी हायअलर्ट जारी करण्यात आला आहे. उत्तर प्रदेश, ओडिशा, आसाम आणि देशातील विविध भागांतून निमलष्करी दलाचे ८ हजार जवान काश्मीर खोऱ्यात पाठवण्यात आले आहेत. अन्य राज्यांतूनही जवानांना काश्मीरमध्ये पाठवण्यास सुरुवात झाली आहे. 

राष्ट्रीय सुरक्षा सल्लागार अजित डोवाल काश्मीरमध्ये 

राष्ट्रीय सुरक्षा सल्लागार अजित डोवाल त्या ठिकाणच्या परिस्थितीचा आढावा घेण्यासाठी जम्मू-काश्मीरला रवाना झाले आहेत.  ते स्वतः या ठिकाणच्या परिस्थितीचा आढावा घेणार आहेत. ते पोहोचण्याआधी दहा हजार सुरक्षा जवानांना तैनात करण्यात आले आहेत. 'टाइम्स नाउ'ने दिलेल्या माहितीनुसार, अजित डोवाल सुरक्षेसंदर्भात एक बैठक घेणार आहेत. जम्मू-काश्मिरात कोणतीही अनुचित घटना घडू नये, यासाठी अजित डोवाल यांनी स्वतःहून त्या ठिकाणी जाण्याचा निर्णय घेतला आहे. कोणत्याही परिस्थितीला सामोरे जाण्यासाठी त्यांनी लष्कराला सतर्क राहण्याच्या सूचना केल्या आहेत.  



  Print






News - World | Posted : 2019-08-06






Related Photos