काश्मीर मुद्द्यावर व्हिप जारी करण्यास नकार देत काँग्रेस पक्षप्रतोद भुवनेश्वर कलिता यांचा राजीनामा


वृत्तसंस्था /  नवी दिल्ली : काश्मीर मुद्द्यावर व्हिप जारी करण्यास नकार देत काँग्रेस पक्षप्रतोद भुवनेश्वर कलिता यांनी तडकाफडकी आपल्या पदाचा व पक्षाचा राजीनामा दिला आहे. हा राजीनामा देतानाच कलिता यांनी काँग्रेसच्या धोरणांवर सडकून टीका केली आहे. यामुळे जम्मू-काश्मीरला विशेष दर्जा देणारं कलम ३७० हटवण्यास तीव्र विरोध करणाऱ्या काँग्रेसला राज्यसभेत मोठा धक्का बसला आहे. 
'पंडित जवाहरलाल नेहरूंनीही कलम ३७० ला विरोध केला होता. हे कलम एक दिवस आपोआप पुसलं जाईल, असं त्यांचं म्हणणं होतं. आज देशातील जनतेचीही हे कलम हटवण्यात यावे, अशी भावना असताना काँग्रेसला मात्र ते मान्य नाही. हे पाहिल्यानंतर काँग्रेस पक्ष आत्महत्या करायला निघाला आहे, असं वाटतं आणि यात मला भागीदार व्हायचे नाही म्हणूनच मी पक्षाचा व्हिप पाळायचा नाही, असे ठरवले आहे. मी याक्षणी काँग्रेस पक्षाचा राजीनामा देत आहे', असे कलिता यांनी जाहीर केले. 
काँग्रेस पक्षाचं आजचं नेतृत्व पक्षाचं वैभव धुळीस मिळवण्याचं काम करत आहे आणि काँग्रेसला उद्ध्वस्त होण्यापासून आता कोणीही वाचवू शकत नाही, असेही कलिता म्हणाले.  दरम्यान, केंद्र सरकारने आज जम्मू-काश्मीरला विशेष दर्जा देणारं कलम ३७० हटवण्याबाबतचं विधेयक राज्यसभेत मांडलं आहे. या विधेयकावर राज्यसभेत आजच मतदान घेतलं जाणार आहे. या पार्श्वभूमीवर कलिता यांनी दिलेला राजीनामा हा काँग्रेससाठी मोठा धक्का आहे. 



  Print






News - World | Posted : 2019-08-05






Related Photos