आजपासून मुख्यमंत्र्यांची महाजनादेश यात्रा , मोझरी येथून प्रारंभ


विदर्भ न्यूज एक्सप्रेस 
प्रतिनिधी / गडचिरोली  :
येत्या विधानसभा निवडणुकीत दुसऱ्यांदा भगवा फडकवण्यासाठी मुख्यमंत्री देवेंद्र फडणवीस यांची महाजनादेश यात्रा आज, गुरुवारी दुपारी २ वाजता मोझरी येथून प्रारंभ होत आहे. यात्रेच्या दुसऱ्या दिवशी २ ऑगस्ट रोजी उपराजधानीत 'रोड शो' होईल. शहरात स्वागताची जय्यत तयारी चालली आहे. काटोल व सावनेरमध्ये त्यांच्या जाहीर सभा झाल्यानंतर रात्री येथे मुक्काम राहील. 
लोकशाहीर अण्णा भाऊ साठे यांची जयंती व लोकमान्य टिळक पुण्यतिथीचे औचित्य साधून मुख्यमंत्री देवेंद्र फडणवीस यांची महाजनादेश यात्रा राष्ट्रसंत तुकडोजी महाराज यांचे जन्मस्थळ असलेल्या अमरावती जिल्ह्याच्या मोझरीतून प्रारंभ होणार आहे. राज्य सरकारच्या पाच वर्षांच्या कामगिरीच्या लेखाजोखा जनतेच्या दरबारात मांडण्यासोबतच निवडणुकीपूर्वी जनसमर्थन मिळवण्याचे प्रयत्न होणार आहेत. यात्रेसाठी दोन रथ आहेत. एक रथ स्वागत व सभास्थळी आधी पोहचेल आणि त्यानंतर मुख्यमंत्र्यांचा रथ निघेल. स्वागतस्थळी होणाऱ्या सभेसाठी अडीच ते तीन हजार आणि मोठ्या सभास्थळी दहा हजार नागरिकांना जमवण्याची जबाबदारी स्थानिक नेते व पदाधिकाऱ्यांवर सोपविण्यात आली आहे. यात्रा प्रमुख सुजितसिंग ठाकूर व यात्रा व्यवस्था प्रमुख भाजप संजय फांजे यांच्यासह १०-१२ अन्य व्यवस्था प्रमुख यात्रेत पूर्णवेळ राहतील. याखेरीज प्रत्येक जिल्ह्यात मंत्री, खासदार, आमदार व प्रमुख पदाधिकारी अशी सुमारे ५५ नेतेमंडळी राहणार आहे. विदर्भ संघटन सचिव डॉ. उपेंद्र कोठेकर, पश्चिम विदर्भाचे संयोजक प्रवीण पोटे, पूर्व विदर्भाचे संयोजक अनिल सोले, गिरीश व्यास यांनी बुधवारी तयारीचा आढावा घेतला. 
विदर्भातील ६२ पैकी ४४ विधानसभा मतदारसंघातून जाणारी ही यात्रा १ हजार २३२ किलोमीटर अंतर पूर्ण करेल. मोझरी येथून यात्रा प्रारंभ झाल्यानंतर तिवसा, तळेगावमार्गे दुपारी ४.३० वाजता आर्वी, ६ वाजता पुलगाव व रात्री ८ वाजता वर्धा येथे सभा व मुक्काम राहील. वर्धा येथून दुसऱ्या दिवशी सकाळी यात्रा सुरू होईल. पवनार, सेलूनंतर बुटीबोरी, खापरी येथे यात्रेचे स्वागत करण्यात येणार आहे. नागपुरात दुपारी २ ते ४ या वेळात रोड शो होणार आहे. सायंकाळी ५.३० वाजता काटोल व ७.३० वाजता सावनेर येथे जाहीर सभा होईल. मुख्यमंत्र्यांचा रात्री नागपुरात मुक्काम आहे. नागपूर जिल्ह्यातील यात्रेत त्यांच्यासोबत पालकमंत्री चंद्रशेखर बावनकुळे राहतील. 

विदर्भातील मार्ग व सभा 

मुख्यमंत्री देवेंद्र फडणवीस यांची महाजनादेश यात्रा तिसऱ्या दिवशी मौदा मार्गे जाईल. दुपारी १.३० वाजता भंडारा, ४ वाजता तुमसर व सायंकाळी ७.३० वाजता गोंदिया येथे सभा व मुक्काम राहील. गोरेगाव, सडक अर्जुनीमार्गे यात्रा जाईल. दुपारी १.३० वाजता अर्जुनी मोरगाव, ४ वाजता वडसा, रात्री ८ वाजता गडचिरोली येथे सभा होईल. ५ ऑगस्ट रोजी सकाळी ११ वाजता मूल, दुपारी १.३० वाजता चंद्रपूर, सायंकाळी ५.३० वाजता राळेगाव आणि रात्री ८ वाजता यवतमाळ येथे जाहीर सभा होतील. ६ ऑगस्ट रोजी दारव्हा येथे दुपारी १२ वाजता, कारंजा येथे २ वाजता सभा, मू्र्तिजापूर येथे ४.३० वाजता रोड शो, सायंकाळी ५ वाजता बोरगाव मंजू व सायंकाळी ७ वाजता अकोला येथे जाहीर सभा होतील. ७ ऑगस्ट रोजी दुपारी १२ वाजता शेगाव, दुपारी २ वाजता खामगाव आणि ४.३० वाजता मलकापूर येथे जाहीर सभा होईल. विदर्भातील ही शेवटची सभा आहे. 
 



  Print






News - Gadchiroli | Posted : 2019-08-01






Related Photos