तिरोडाचा तहसीलदार आणि खासगी इसम अडकले लाचलुचपत प्रतिबंधक विभागाच्या जाळ्यात


विदर्भ न्यूज एक्सप्रेस
प्रतिनिधी / गोंदिया :
रेती भरलेला ट्रक  पकडल्यानंतर कोणतीही कारवाई न करता सोडून देण्यासाठी ७०  हजारांची लाच स्वीकारल्याप्रकरणी तिरोडा येथील तहसीलदार आणि एका खासगी इसमावर लाचलुचपत प्रतिबंधक विभागाने कारवाई केली आहे.
संजय यादवराव रामटेके (५४)  असे लाचखोर तहसीलदाराचे तर  विपील सिध्दार्थ कुंभारे (२९)  असे लाचखोर खासगी इसमाचे नाव आहे.
प्राप्त माहितीनुसार तक्रारदाराच्या मालकीचा ट्रक  क्रमांक एमएच ३६  एए २३५८  ने  तुमसर तालुक्यातील चारगाव रेती घाटावरून वाळू खरेदी करून वाहतूक करीत असताना तहसीलदार रामटेके यांनी बोदलकसा जंगलात त्यांचा ट्रक  पकडला. ट्रक  सुकी गावाकडे नेवून अवैध वाळूच्या ट्रकवर कोणतीही कायदेशिर कारवाई न करण्यासाठी ४०  हजार रूपये लाच रक्कमेची मागणी केली. तसेच तक्रारदाराच्या मित्राच्या दोन ट्रकद्वारे  वाळु वाहतूकीसाठी प्रती महिना ३०  हजार रूपयांची मागणी केली. अशा एकूण ७०  हजारांची लाच घेताना पकडण्यात आले आहे.
भंडारा लाचलुचपत प्रतिबंधक विभागाने कार्यवाही करून खासगी इसम विपील सिध्दार्थ कुंभारे याच्या मार्फत लाच स्वीकारताना रंगेहात पकडले. तहसीलदार संजय रामटेके आणि विपील कुंभारे विरूध्द तुमसर पोलिस ठाण्यात गुन्हा दाखल करण्यात आला आहे. सदर कारवाई पोलिस उपायुक्त, पोलिस अधीक्षक रश्मी नांदेडकर ,  पोलिस उप अधीक्षक राजेश दुद्दलवार यांच्या मार्गदर्शनात पोलिस उपअधीक्षक महेश चाटे, पोलिस निरीक्षक योगेश्वर पारधी, पोलिस हवालदार गणेश पडवाल, नापोशि अश्विनकुमार गोस्वामी, संजय कुरंजेकर, पराग राउत, सचिन हलमारे, कुणाल कडव, चालक शिपाई दिनेश धार्मिक यांनी केली आहे.

 



  Print






News - Gondia | Posted : 2019-07-30






Related Photos