जुगार खेळताना पोलिसांनी छापा टाकल्याच्या अफवेने चौघांनी घेतली नाल्यात उडी, दोघांचा मृत्यू


विदर्भ न्यूज एक्सप्रेस 
 प्रतिनिधी /  नागपूर :
  जुगार खेळताना पोलिस छापा टाकत असल्याचा समज झाल्याने चौघांनी नाल्यात उडी घेतली. यात दोघांचा गाळात बुडून मृत्यू झाला तर दोघे बचावले असल्याची   घटना शनिवारी उमरेड मार्गावरील बहादुऱ्याजवळील पांढुर्णा येथे उघडकीस आली. शेख जावेद शेख इक्बाल (२२)  रा. हसनबाग व इरफान शेख ऊर्फ सोनू जिब्राईल (३०)   रा. सरताज कॉलनी, मोठा ताजबाग अशी मृतांची नावे आहेत. पोलिसांनी कुठलाही छापा टाकला नव्हता . १५ ते १६ जण जुगार खेळत होते. एका कारमधून साध्या वेशात चार ते पाचजण उतरले. पोलिस असल्याचा समज झाल्याने जुगार खेळणारे तेथून पळाले. चौघांनी नाल्यात उडी टाकली. दोघांचा मृत्यू झाला, असे परिमंडळ चारचे पोलिस उपायुक्त राजतिलक रोशन यांनी स्पष्ट केले. 
मिळालेल्या माहितीनुसार, शुक्रवारी दुपारी पांढुर्णातील नाल्याजवळ १६ युवक जुगार खेळत होते. याचदरमम्यान एक कार तेथे आली. कारमधून चार ते पाचजण उतरले. पोलिस छापा टाकत असल्याची अफवा पसरली. जुगाऱ्यांनी तेथून पळ काढला. चौघांनी नाल्यात उडी घेतली. दोघे गाळात फसले, यातच त्यांचा बुडून मृत्यू झाला. तर पोहता येत असल्याने दोघे नाल्यातून बाहेर निघाले. शनिवारी सकाळी एका नागरिकाला युवकाचा मृतदेह नाल्यात दिसला. त्याने पोलिस नियंत्रण कक्षाला माहिती दिली. नियंत्रण कक्षाने सक्करदरा पोलिसांना कळविले. माहिती मिळताच सक्करदरा पोलिस व अग्निशमन विभागाचे जवान तेथे पोहोचले. जावेदचा मृतदेह बाहेर काढला. नातेवाइकांनी त्याची ओळख पटविली. पोलिसांनी पंचनामा करून जावेदचा मृतदेह मेडिकल कॉलेज हॉस्पिटलकडे रवाना केला. जावेदसह इरफानही बेपत्ता असल्याची तक्रार सक्करदरा पोलिसांत होती. पोलिसांनी अग्निशमन विभागाच्या मदतीने इरफानचाही शोध सुरू केला. दुपारी ४ वाजताच्या सुमारास इरफानचाही मृतदेह आढळून आला. पोलिसांनी त्याचाही मृतदेह उत्तरीय तपासणीसाठी मेडिकल कॉलेज हॉस्पिटलकडे रवाना केला. याप्रकरणी सक्करदरा पोलिसांनी आकस्मिक मृत्यूची नोंद करून तपास सुरू केला आहे. 

 



  Print






News - Nagpur | Posted : 2019-07-28






Related Photos