डॉ. अभय बंग यांनी मुरूमगावच्या महिलांची भेट घेऊन धाडसाचे केले कौतुक


- डॉ. अभय बंग आणि मुक्तिपथ चमूने प्रत्यक्ष जागेची केली पाहणी
विदर्भ न्यूज एक्सप्रेस 
प्रतिनिधी /  गडचिरोली :
धानोरा तालुक्यातील मुरूमगाव येथील महिलांनी बुधवारी रात्री रिडवाई रोडवरून चोरून लपून दारूची वाहतूक करणारे वाहन पकडून जवळपास साडेचार लाखाचा दारूसाठा पोलिसांच्या स्वाधीन केला. यासाठी महिला रात्रभर जंगलात थांबल्या. विक्रेत्याकडून महिलांना जीवे मारण्याचाही प्रयत्न झाला. महिलांच्या या कामगिरीची दखल घेत मुक्तिपथचे संस्थापक डॉ. अभय यांनी मुरूमगाव ला भेट देऊन महिलांकडून सर्व प्रकार समजून घेतला. सोबतच घटनास्थळाची पाहणी करून कारवाई संदर्भात स्थानिक पोलिसांशी चर्चाही केली.
  येथील व्यंकटेश बहिरवार हा इसम छत्तीसगड मधून दारूची आयात करून जिल्ह्यात या दारूचा पुरवठा करतो. पोलीस रात्री गस्त घालू शकत नसल्याने या संधीचा फायदा घेत रात्री दारूची वाहतूक करतो. त्यामुळे येथील गाव संघटनेच्या महिलांनी रात्री पाळत ठेवणे सुरु केले. बुधवारी एक संशयित वाहन त्यांना दिसले. या वाहनाचा पाठलाग केला असता मोठा साठा जंगलात असल्याचे त्यांच्या लक्षात आले. रात्रभर जंगलात थांबून वाहतूक करणाऱ्यांची त्यांनी अडवणूक केली. सकाळी ही दारू पकडण्यासाठी महिला गेल्या असता व्यंकटेश बहिरवार ने त्यांच्या अंगावर वाहन चढविण्याचा प्रयत्न केला. महिलांच्या तक्रारीवरून व्यंकटेश वर गुन्हा दाखल करण्यात आला आहे. हा सर्व घटनाक्रम जाणून घेत डॉ. अभय बंग यांनी महिलांच्या साहसाचे कौतुक करून आरोपीवर कारवाईसाठी चर्चा केली.
पोलिसांचे आम्हाला विशेष सहकार्य मिळत नसल्याचे यावेळी महिलांनी सांगितले. आरोपीला शिक्षा होण्यासाठी तक्रारीवर ठाम राहण्याविषयी सांगत मुक्तिपथ आणि सर्च तुमच्या पाठीशी असल्याचे डॉ. बंग यावेळी म्हणाले. महिलांसोबत घटनास्थळी जाऊन प्रत्यक्ष जागेची आणि दारू तस्करी होत असलेल्या मार्गाची त्यांनी पाहणी केली. यानंतर लगेच पोलीस उपनिरीक्षक थोरात यांच्याशी चर्चा करून या घटनेच्या तपासाबाबत विचारणा केली. आरोपी फरार असून पोलीस त्याचा शोध घेत असल्याचे थोरात यांनी सांगितले. महिलांच्या जीवितास धोका असल्याने घटनेचे गांभीर्य लक्षात घेत तपासाची गती वाढविण्याविषयीही डॉ. बंग यांनी सुचविले. फरार आरोपी किंवा त्याच्या साथीदाराकडून गावातील महिला कार्यकर्त्यांना कोणताही धोका किंवा त्रास होऊ देणार नाही अशी ग्वाही पोलीस उपनिरीक्षक थोरात यांनी दिली. पोलीस रात्री बाहेर पडू शकत नसले तरी दारूबंदीसाठी महिला रात्रीचा विचार न करता पाळत ठेवत आहेत. त्यामुळे त्यांच्या या परिश्रमाची पोलिसांनी जाण ठेवावी असेही डॉ. बंग म्हणाले. यावेळी मुक्तिपथचे संचालक डॉ. मयूर गुप्ता, डॉ. आनंद बंग, तालुका मुक्तिपथ चमू, मुरूमगाव च्या सरपंच, सदस्य आणि गाव संघटनेच्या महिला उपस्थित होत्या.  



  Print






News - Gadchiroli | Posted : 2019-07-08






Related Photos