महत्वाच्या बातम्या

निवृत्तीवेतन धारकांनी हयात असल्याचे प्रमाणपत्र सादर करावे

विदर्भ न्यूज एक्सप्रेस
प्रतिनिधी / चंद्रपूर : चंद्रपूर कोषागार कार्यालयामार्फत, बँकेद्वारे निवृत्तीवेतन घेणा-या सर्व निवृत्तीवेतन धारकांनी, १ नोव्हेंबर २०२३ रोजी हयात असल्याच्या प्रमाणपत्राची यादी बँकांना पाठविण्यात आली आहे.

त्यामुळे निवृत्तीवेतन धारकांनी ३० नोव्हेंबर २०२३ पूर्वी बँकेत स्वत: उपस्थित राहून आपल्या नावाच्या समोरील रकान्यात मोबाईल क्रमांक, पॅन क्रमांक, आधारकार्ड क्रमांक नमूद करून स्वाक्षरी करावयाची आहे. जेणेकरून हयात असल्याचे प्रमाणपत्राची यादी कोषागार कार्यालयाला वेळीच प्राप्त होईल व त्यांचे माहे डिसेंबर २०२३ पासूनचे निवृत्तीवेतन बँकेकडे वेळीच पाठविता येईल.

तसेच जे निवृत्तीवेतन धारक मनिऑर्डरद्वारा निवृत्ती वेतन घेतात, त्यांनी आपले हयात प्रमाणपत्र राजपत्रित अधिका-यांकडून प्रमाणित करून ३० नोव्हेंबरपर्यंत कोषागार कार्यालयाला पाठवावे. हयात प्रमाणपत्र ५ डिसेंबर २०२३ पर्यंत प्राप्त न झाल्यास त्यांचे माहे डिसेंबर २०२३ पासूनचे निवृत्तीवेतन बँकेकडे पाठविले जाणार नाही, याची सर्वांनी नोंद घ्यावी, असे कोषागार अधिकारी यांनी कळविले आहे.