नागपुरातील चार खासगी रुग्णालयांना मुख्यमंत्री कार्यालयाने टाकले काळ्या यादीत


विदर्भ न्यूज एक्सप्रेस 
प्रतिनिधी / नागपूर :
एकाच रुग्णाच्या उपचाराचे देयक महात्मा फुले जनआरोग्य योजना, मुख्यमंत्री वैद्यकीय सहाय्यता निधी आणि रुग्ण अशा तिघांकडूनही वसूल करणे, मुख्यमंत्री वैद्यकीय सहाय्यता निधीची दोनदा उचल करणे, अशा कारणांमुळे शहरातील चार खासगी रुग्णालयांना मुख्यमंत्री कार्यालयाने चार खासगी रुग्णालयांना निधीत अनियमितता केल्याचा ठपका ठेवत  काळ्या यादीत टाकले आहे.
 केअर रुग्णालय, विनस हॉस्पिटल, एचजीसी नार्ची, न्यू ईरा या रुग्णालयांचा यामध्ये  समावेश आहे. मुख्यमंत्री देवेंद्र फडणवीस यांनी अत्यवस्थ गरीब रुग्णांसाठी मुख्यमंत्री वैद्यकीय सहाय्यता निधी कक्ष नागपुरात सुरू केला आहे. या कक्षाकडून प्रत्येक आठवड्यात विदर्भाच्या विविध खासगी वा शासकीय रुग्णालयांत अत्यवस्थ गरीब रुग्णाच्या उपचारासाठी पैसे मंजूर केले जातात. हा निधी संबंधित रुग्णाचे अर्ज मंजूर झाल्यावर विशिष्ट प्रक्रिया करून थेट रुग्णालयांच्या खात्यात वळता केला जातो. महात्मा फुले जनआरोग्य योजनेचा लाभ घेतलेल्या रुग्णाला आवश्यक निधी उपलब्ध होत असल्याने त्यांना मुख्यमंत्री वैद्यकीय सहाय्यता निधीची गरज नसते.
या चारपैकी काही रुग्णालयांनी मुख्यमंत्री वैद्यकीय सहाय्यता निधीतून मदत मिळाल्यावरही महात्मा फुले जनआरोग्य योजनेतूनही रुग्णाच्या देयकाची उचल केली. रुग्णाकडूनही देयकाचा निधी वसूल केला व सोबतच काहींनी मुख्यमंत्री वैद्यकीय सहाय्यता निधीची दोनदा उचल केली. अखेर या रुग्णालयांना काळ्या यादीत टाकण्यात आले आहे. हे प्रकरण काही दिवसांपूर्वी विभागीय आयुक्त अध्यक्ष असलेल्या समितीपुढे आले व नंतर शासनाच्या वरिष्ठ स्तरावर गेले. या कारवाईमुळे या रुग्णालयांना यापुढे मुख्यमंत्री वैद्यकीय सहाय्यता निधीतून मदत मिळणार नाही. त्यातील काहींना महात्मा फुले जनआरोग्य योजनेतूनही बडतर्फ केले गेले असून काहींवर कारवाईबाबतची प्रक्रिया सुरू आहे, अशी माहिती प्राप्त झाली आहे. 



  Print






News - Nagpur | Posted : 2019-07-04






Related Photos