महत्वाच्या बातम्या

मेरी माटी मेरा देश अभियानांतर्गत जिल्ह्यातील अमृत कलशासह स्वयंसेवक रवाना

- जिल्हाधिका-यांची उपस्थिती

विदर्भ न्यूज एक्सप्रेस
प्रतिनिधी / नागपूर : स्वातंत्र्याच्या अमृत महोत्सवांतर्गत मेरी माटी, मेरा देश अभियानात नागपूर जिल्ह्यातील स्वयंसेवकांसोबत जिल्ह्यातील १५ अमृत कलश आज जिल्हाधिकारी कार्यालयातून रवाना करण्यात आले. यावेळी जिल्हाधिकारी डॅा. विपीन इटनकर आणि जि.प.च्या मुख्य कार्यकारी अधिकारी सौम्या शर्मा यांची उपस्थिती होती.

जिल्ह्यातील १३ पंचायत समिती, १ महानगरपालिका व सर्व नगरपालिका मिळून १ असे १५ अमृत कलश आज सायंकाळी नेहरू युवा केंद्राच्या ३० स्वयंसेवक आणि एका मार्गदर्शकासह मुंबईकडे रवाना झाले. मुंबईच्या आजाद मैदान येथे २७ ऑक्टोबर रोजी राज्यातील सर्व अमृत कलशांचे पूजन होईल व त्यानंतर ते दिल्लीसाठी रवाना होतील.
मेरी माटी, मेरा देश अभियानामध्ये अमृत कलशाच्या माध्यमातून जिल्ह्यातून एकत्र केलेली माती दिल्ली येथील कर्तव्यपथावर उभारण्यात येत असलेल्या अमृत महोत्सव स्मारकातल्या अमृत वाटिकेत अर्पण केली जाईल. दिल्ली येथे ३१ ऑक्टोबर रोजी प्रधानमंत्री नरेंद्र मोदी यांच्या उपस्थितीत मुख्य समारंभ होणार आहे.