बियाणे आणि खते खरेदी करताना सावधानता बाळगा


विदर्भ न्यूज एक्सप्रेस 
प्रतिनिधी / गडचिरोली :
शेतकऱ्यांना पावसाने काही प्रमाणात दिलासा दिल्याने शेतकरी  बियाणे आणि खते खरेदी करण्यासाठी गर्दी करीत आहेत. बियाणे खरेदीत कंपण्यांकडून शेतकऱ्यांची फसवणूक होऊ शकते,  यामुळे सावधगिरी बाळगण्याचा  इशारा कृषी विभागाने दिला आहे.
  अधिकृत बियाणे खरेदी परवानाधारक यांच्याकडूनच करावी. बियाणे खरेदी करताना न चुकता पक्के बिल घ्यावे. बिलात पीक, वाण लॉट क्रमांक, वजन, अंतिम मुदत, कंपनीचे पूर्ण नाव नमूद असले पाहिजे. कृषी केंद्रधारकाने पक्के बिल न दिल्यास तत्काळ कृषी कार्यालयात संपर्क करावा. बियाणे पाकिटावरील सरकारमान्य चिन्ह तपासून घ्यावे. बोलगार्ड २ मध्ये उपलब्ध असलेल्या बिजी-२ या वाणाची एमआरपी किंमत ७३० रुपये आहे. पाकिट सीलबंद असल्याची खात्री करावी. बिजी- २ तंत्रज्ञान सर्व वाणामध्ये सारखेच असते. त्यामुळे एका विशिष्ट वाणाची मागणी टाळावी, असेही म्हटले आहे. मान्यता नसलेले बोगस व बेकायदेशीर (एचटीबीटी) बियाणे (आरआर किंवा राऊंडअप बीटी किंवा तणावरची बीटी किंवा बिडगार्ड) आदी नावाने विक्री केली जाण्याची शक्यता आहे. असे बियाणे अधिकृत नाही. त्याला शासनाची मान्यता नाही. असे बियाणे जादा दराने विक्री करून पावती दिली जात नाही. मान्यता नसलेल्या बोगस व बेकायदेशीर बियाण्याच्या पाकिटावर कोणत्याही प्रकारचे तंत्रज्ञान, वाण, कोणत्या क्षेत्रासाठी शिफारस केली आहे, याचा उल्लेख नसतो व गुणवत्तेचे विवरण नसते.
बोगस बियाण्यामुळे शेताचे व पर्यावरणाचे नुकसान होते. त्यामुळे जिल्ह्यात जर कोणतीही व्यक्ती बोगस व बेकायदेशीर बियाणे विक्री करताना आढळून आल्यास तत्काळ कळवावे. बेकायदेशीर बियाणे विक्री करणाऱ्या व्यक्तीवर बियाणे नियंत्रण आदेश (१९८३), महाराष्ट्र कापूस बियाणे अधिनियम (२००९ व २०१०), पर्यावरण संरक्षण कायदा (१९८६)अंतर्गत कायदेशीर कारवाई करण्यात येईल, अशी माहिती कृषी विभागाने दिली आहे. 



  Print






News - Gadchiroli | Posted : 2019-06-29






Related Photos