जांभुळखेडा बाॅम्बस्फोट प्रकरणी आणखी ३ आरोपी ताब्यात, आरोपींची संख्या सात वर


विदर्भ न्यूज एक्सप्रेस
प्रतिनिधी / गडचिरोली :
कुरखेडा तालुक्यातील जांभुळखेडा जवळील लेंढारी नाल्याजवळ १ मे रोजी नक्षल्यांनी भुसुरूंग स्फोट घडवून आणला होता. या स्फोटो शिघ्र कृती दलाचे १५  जवान शहीद झाले होते. तर खासगी वाहन चालक ठार झाला होता. या घटनेचा तपास सुरू असून दंडकारण्य स्पेशल झोनल प्रमुख नर्मदाक्का व तिचा पती किरणदादा यांना अटक केल्यानंतर घटनेशी सबंधित आरोपींच्या मुसक्या आवळल्या जात आहेत. २३  जून रोजी ३ आरोपींना अटक करण्यात आली असून आतापर्यंत सात आरोपींना अटक करण्यात आली आहे.
सोमनाथ दलसाय मडावी (३८) , किसन सिताराम हिडामी (४२)  आणि सकरू रामसाय गोटा (३५)  तिघेही रा. लवारी ता कुरखेडा अशी अटक करण्यात आलेल्या आरोपींची नावे आहेत. या तिघांनाही काल २४  जून रोजी न्यायालयाने १२  दिवसांची पोलिस कोठडी ठोठावली आहे.
जांभुळखेडा बाॅम्बस्फोट प्रकरणी दंडकारण्य स्पेशल झोनल समितीची सदस्या तसेच वेस्टर्न सब झोनल प्रमुख उप्पगुंटी निर्मलाकुमारी उर्फ नर्मदाक्का  व तिचा पती सत्यनारायण उर्फ किरण उर्फ किरणदादा या दोघांना १९  जून रोजी अटक करण्यात आली होती. तपास पथकांनी तेलंगणा राज्यातून लॅपटाॅप, मोबाईल, पेन डाईव्ह व इतर संशयीत साहित्य जप्त  करण्यात आले. या गुन्ह्यातील आरोपींच्या सहभागाविषयी दोघांची कसून चौकशी  करण्यात आली. यामुळे पुराव्यांच्या आधारे १३  जून रोजी लवारी येथीलच दिलीप श्रीराम हिडामी, परसराम मंगाराम तुलावी या दोघंना अटक करण्यात आली होती. दोघांना पोलिस कोठडी ठोठावण्यात आली होती. २४  जून रोजी पोलिस कोठडी संपल्यानंतर प्रथम श्रेणी न्यायदंडाधिकार्यांनी आणखी १०  दिवस पोलिस कोठडी वाढवून दिली आहे. आता या गुन्ह्यातील आरोपींची संख्या ७ झाली असून पुढील तपास सुरू आहे.

 



  Print






News - Gadchiroli | Posted : 2019-06-25






Related Photos