यवतमाळ जिल्ह्यातील २४ गावांत जाणवला भूकंपाचा सौम्यधक्का


- नुकसान नाही; जनजीवन सुरळीत
विदर्भ न्यूज एक्सप्रेस 
वृत्तसंस्था / यवतमाळ :
जिल्ह्याच्या सहा तालुक्यांतील २४ गावांत शुक्रवारी रात्री ९.२२ वाजता भूकंपाचा सौम्य धक्का जाणवला. यामुळे या गावांत भीतीचे वातावरण पसरले होते. रात्री घरातील भांडी पडली, तर बंद सिलिंग फॅन हलल्यासारखे झाले. दरम्यान भूकंप होत असल्याचे संदेश व्हॉट्सअॅपवर व्हायरल झाल्याने नागरिकांत भीतीचे वातावरण पसरले होते. हा भूकंप रिश्टर स्केलवर ३.७ तीव्रतेचा नोंदला गेल्याचे असे प्रशासनाने कळविले आहे.
शुक्रवारी रात्री ९.२२ वाजता जिल्ह्यातील अनेक गावांत भूकंपाचा धक्का बसल्याने या गावांतील नागरिक रस्त्यावर आले. अनेक नागरिक घरात जाण्याची हिंमत करीत नव्हते. मात्र भीती बाळगण्याचे कारण नाही हे समजल्यावर रात्री १२ वाजतानंतर नागरिकांची भीती काही प्रमाणात दूर झाली. अनेक गावांतील नागरिक रात्रभर जागेच होते. उमरखेड तालुक्यातील कुरुळी, नारळी, बोरगाव, साखरा, निगनूर, अकाली, मल्याळी, ढाकणी, बिटरगाव, खरुस, चातारी, एकंबा, टेंभूरधरा; आर्णी तालुक्यातील राणी, धानोरा, अंजनखेड, साकुर, मुकिंदपूर; महागाव तालुक्यातील हिवरा, इंजनी; घाटंजी तालुक्यातील चिखल, वर्धा, मुरली, दिग्रस तालुक्यातील सिंगद आणि दारव्हा तालुक्यातील खोपडी या गावांत रिश्टर स्केलवर ३.७ तीव्रतेचा धक्का होता, असे प्रशासनाने कळविले आहे. भूकंपाच्या धक्क्यामुळे नागरिकांमध्ये निर्माण झालेल्या भीतीच्या वातावरणामुळे नागरिकांनी खबरदारी म्हणून काय करावे व काय करू नये, याबातच्या सूचना नागरिकांना जिल्हा प्रशासनाने दिल्या आहेत. भूकंपाचे धक्के बसलेल्या गावांमध्ये शासकीय अधिकारी व कर्मचाऱ्यांनी भेटी देऊन त्यांना धीर दिला.



  Print






News - Rajy | Posted : 2019-06-23






Related Photos