रूग्णवाहिका चालकाची राष्ट्रपतींकडे इच्छामरणाची मागणी


विदर्भ न्यूज एक्सप्रेस
प्रतिनिधी / भंडारा :
अशकाॅम कंपनी भोपाल येथे रूग्णवाहिका चालक असलेल्या व शासकीय रूग्णवाहिका वाहन चालक संघटनेचे भंडारा जिल्हा अध्यक्ष असलेल्या जितेंद्र मुलचंद डोंगरे यांनी कंपनीच्या व्यवहाराला   कंटाळून राष्ट्रपतींना पत्र लिहून इच्छामरणाची मागणी केली आहे. 
जितेंद्र मुलचंद डोंगरे हे पहेला प्राथमिक आरोग्य केंद्रांतर्गत जवळपास १५ वर्षांपासून वाहन चालक म्हणून कार्यरत आहेत. मे अशकाॅम कंपनी प्रा. लि. या कंपनीला एकदा २०१८ मध्ये शासनाकडून कंत्राट देण्यात आले. त्या कंपनीला प्रती वाहन चालक १५ हजार रूपये शासनाकडून प्राप्त होते. मात्र सदर कंपनीकडून वाहन चालकांना फक्त ८ हजार ६२८ रूपये देण्यात येते. वाहन चालक आपल्या कर्तव्यावर २४ तास कार्यरत राहत असून कंपनी त्यांना २४ तास काम करण्यास प्रवृत्त करीत आहे. संपूर्ण राज्यात वाहन चालक अहोरात्र काम करीत आहेत. तरीही कंपनीकडून वेळेवर पगार दिले जात नाही, असे डोंगरे यांनी म्हटले आहे.
राज्यात कंपनीमार्फत ८१८ वाहन चालक कार्यरत आहेत.   कंपनी कपात करून देत असलेल्या ८ हजार ६२८ रूपयांमध्ये संसाराचा गाडा चालविणे कठीण झाले आहे. जितेंद्र डोंगरे हे एक महिन्यापासून प्रकृती अस्वास्थ्याने ग्रासले होते. याबाबतची माहिती अशकाॅम कंपनीला देण्यात आली. जवळपास सात ते आठ डाक्टरांशी संपर्क साधल्यानंतर ऑपरेशन शिवाय पर्याय नसल्याची कल्पना कंपनीचे व्यवस्थापक मक्रांत यांना दिली होती. परिस्थिती हलाखीची असल्याने कंपनीकडून आर्थिक मदत मिळावी अशी मागणी केली. आपणाकडे रहायला घर नाही, शेती नाही किंवा कोणताही उद्योगधंदा नाही. यामुळे मदतीची याचना केली. मात्र कंपनीने कुठलीही मदत करण्यास नकार दिला. यामुळे आत्महत्येचा विचार आला. मात्र कुटूंबीयांचा विचार करता आत्महत्या सुध्दा करू शकत नाही. डोंगरे यांच्या माहितीनुसार त्यांच्या युरीनची नलिका पूर्णपणे ब्लाॅक झाली होती. महात्मा ज्योतिबा फुले जिवनदायीन योजना तसेच प्रधानमंत्री जन आरोग्य योजनेच्या कार्यालयात संपर्क साधला असता या योजनेतून ऑपरेशन  करता येणार असल्याचे आरोग्यमित्रांनी सांगितले. यामुळे या योजनेतून ऑपरेशन करण्यात आले आहे. 
अशकाॅम कंपनी वाहन चालकांवर अन्याय करीत आहे. यामुळे कंपनीचे कंत्राट तातडीने रद्द करण्यात यावे, प्रतिमाह १५ हजार रूपये वेतन देण्यात यावे, माझ्यावर जशी वेळ आली तशी इतर वाहनचालकांवर येवू नये याकरीता प्रकरणाची चैकशी करून दोषीवर कारवाई करण्यात यावी अन्यथा इच्छामरणाची परवानगी देण्यात यावी, अशी मागणी डोंगरे यांनी केली आहे.

 



  Print






News - Bhandara | Posted : 2019-06-21






Related Photos