महत्वाच्या बातम्या

वर्धा जिल्ह्यातील ६३ ग्रामपंचायतींसाठी निवडणूकीचा कार्यक्रम जाहिर

- २९ सार्वत्रिक तर ३४ ग्रापंच्या रिक्त जागांसाठी निवडणूक

- ५ नोव्हेंबर रोजी होणार मतदान

विदर्भ न्यूज एक्सप्रेस

प्रतिनिधी / वर्धा : जानेवारी ते डिसेंबर २०२३ या कालावधीत मुदत संपणा-या तसेच नव्याने स्थापित व सन २०२२ मध्ये चुकीची प्रभागरचना झाल्यामुळे निवडणुका न होऊ शकलेल्या ग्रामपंचायतींच्या निवडणूकीचा कार्यक्रम जाहीर करण्यात आला आहे.

सदस्य पदासह थेट सरपंच पदासाठीच्या सार्वत्रिक निवडणुकांसाठी संगणकप्रणालीद्वारे तसेच ग्रामपंचायतीतील रिक्त जागांच्या पोटनिवडणुकीसाठी पारंपारिक पध्दतीने राबविण्याचा प्रत्यक्ष निवडणूक कार्यक्रम जाहिर करण्यात आला असून त्यानूसार मतदान ५ नोव्हेंबर रेाजी होणार आहे.

जिल्ह्यातील २९ मुदत संपणा-या ग्रामपंचायतीचा व ३४ ग्रामपंचायतीतील रिक्त असलेल्या अशा एकुण ६३ ग्रामपंचायतीत सदस्य पदासाठी निवडणूक होणार आहे. पोटनिवडणूक होत असलेल्या ३४ ग्रामपंचायतीतील ४७ सदस्य पदासाठी व २ थेट सरपंच पदासाठी अशा ४९ रिक्त जागासाठी निवडणूक होणार आहे.

६ ऑक्टोबर रोजी निवडणूकीची नोटीस प्रसिध्द करण्यात येईल. १६ ते २० ऑक्टोंबर या कालावधीत सकाळी ११ ते दुपारी ३ वाजेपर्यंत नामनिर्देशनपत्रे मागविणे व सादर करण्यात येईल. २३ ऑक्टोंबर रोजी सकाळी ११ वाजतापासुन नामनिर्देशनपत्राची छाननी करण्यात येणार आहे.

२५ ऑक्टोबर दुपारी ३ वाजेपर्यंत नामनिर्देशनपत्रे मागे घेता येणार आहे तर दुपारी ३ वाजतानंतर निवडणूक चिन्ह नेमून अंतिमरित्या निवडणूक लढविणा-या उमेदवारांची यादी प्रसिध्द करण्यात येणार आहे. आवश्यकता असल्यास ५ नोव्हेंबर रोजी मतदान घेण्यात येईल. ६ नोव्हेंबर रोजी मतमोजणी व निकाल जाहिर करण्यात येईल. ९ नोव्हेंबर रोजी जिल्हाधिकारी कार्यालयामार्फत निवडणूकीच्या निकालाची अधिसुचना प्रसिध्द करण्यात येईल.