स्विस बँकांमध्ये बेनामी संपत्ती बाबत ५० भारतीय खातेधारकांना नोटीस


वृत्तसंस्था /  नवी दिल्ली :  स्विस बँकांमध्ये बेनामी संपत्ती आणि खाती असणाऱ्यांवर भारत आणि स्वित्झर्लंड सरकारने धडक कारवाई करण्यास सुरुवात केली आहे. स्वित्झर्लंडमधील अधिकाऱ्यांनी याबाबत सुमारे ५० भारतीय  खातेधारकांची माहिती भारतीय अधिकाऱ्यांना देण्यासाठी प्रक्रियेला गती दिली आहे. तसेच या खातेधरकांना नोटीस पाठवून याबाबतचे स्पष्टीकरण मागवले आहे. त्यांच्याकडून समाधानकारक उत्तर आले नाही तर हिंदुस्थानला या खातेधारकांची माहिती देऊन पुढील कारवाई करण्यात येणार आहे. 
नोटीस बजावण्यात आलेल्या  खातेधारकांमध्ये जमीन व्यावसायिक, आर्थिक सेवा, औद्योगिक क्षेत्रातील व्यावसायिक, इंजिनिअरिंग उत्पादनाशी संबंधित क्षेत्रातील व्यक्तींचा समावेश आहे. यापैकी काही खातेधारकांच्या बनावट कंपन्या असल्याचा संशयही व्यक्त होत आहे.
दोन देशांतील माहितीच्या आदानप्रदान करारातंर्गत ही माहिती देण्यात येणार असल्याचे अधिकाऱ्यांनी सांगितले. कर चोरांचा आश्रयदाता देश ही आपली प्रतिमा बदलण्यासाठी स्वित्झर्लंड सरकारने गेल्या काही वर्षापासून कायद्यात अनेक सुधारणा केल्या आहेत. त्यासाठी विविध देशातील संशियत खातेधारकांची माहिती संबंधित देशांना देण्याच्या प्रक्रियेला स्विस सरकारने वेग दिला आहे. भारतात काळा पैशांचा विषय ऐरणीवर आला आहे. भारतानेही काळा पैसा आणि बेनामी स्विस खातेधारकांवर कारवाई सुरू केली आहे.  
खातेधारकांची गोपनीयता राखण्यासाठी स्विस बँकाची जगभरात ओळख आहे. त्यामुळे करचोरांचे आश्रयस्थान अशी स्विस बँकांची ओळख बनली आहे. ही प्रतिमा बदलण्यासाठी स्विस सरकारने माहितीच्या आदानप्रदान करारांतर्गत काही देशातील संशयित खातेधारकांची माहिती देण्यास सुरुवात केली आहे.  



  Print






News - World | Posted : 2019-06-16






Related Photos